هلمند کې د مرخېړیو کرکېله ښه پایله ورکړې

۲۸ سلواغه ۱۳۹۹
د هلمند د کرنې، اوبولګولو او مالدارۍ ریاست له خوا په دې ولایت کې په توافقي ډول مرخېړي کرل شوې وه، چې پایله یې ډېر ښه او مثبته ده.
د هلمند دکرنې رییس زلمي الکو وایي، د مرخېړیو  ارزښت ته په کتو غواړي، چې په دې ولایت کې د مرخېړیو کرکیله ترویج کړي چې له یوې خوا د کوکنارو ښه بدیل دی او له بلې خوا د بزګرانو په اقتصادي وده کې هم رغنده رول لري.
د ښاغلي الکو په خبره په همدې موه ددې ولایت ۴۰ بې وزله مېرمنو ته په کور د ننه د مرخېړیو د کرکېلي زمینه برابره شوې ده، چې اوس یې مرخېړې په حاصل راغلي دي او حاصل یې د هلمند ولایت بازار ته د پلور په پار وړاندې شوي دي.
زلمی الکو وایي، چې د ملګرو ملتونو دخوړو نړیوالې ادارې  په مالي او د بشري قواوو پراختیایي ادارې په تخنیکي همکاریو د هلمند ۴۰ کونډو، بې سرپرسته او بې وزله مېرمنو ته په خپلو کورنیو کې د مرخېړیو د روزنې په برخه کې د کار زمینه برابره شوې ده. یادو مېرمنو ته د مرخېړیو د کرکېلي او تولید ۱۵ اړین توکي او د مرخېړیو د تولید او ټولولو په برخه کې اړینې روزنې ورکړل شوي دي، ترڅو له دې لارې مرخېړي تولید او خپلې ورځنۍ اړتیاوې ورباندې پوره کړي.
له دغو مرستو برخمن شوې مېرمنې خوښ دي، چې په کور د ننه ورته دکار زمینه برابره شوې او له دې لارې د خپلو کورنیو اړتیاوې پوره کوي.
د هلمند د کرنې، اوبولګولو مالدارۍ ریاست هلې ځلې کوي، چې کروندګرو ته نوښتونه او نوي لارې چارې ور وپېژنې، چې د دوی په اقتصاد کې د مثبت بدلون لامل شي.
د مرخېړیو تولید او پالنه اسانه او په بازار کې یې بیه لوړ ده. کروندګر کولای شي، چې له دې لارې ښه عاید تر لاسه کړي.
د هلمند دکرنې رییس وایي د کرنې ریاست هلې ځلې کوي، چې د مرخېړیو ترڅنګ ګڼ شمېر نور ارزښت لرونکي بوټې هم په دې ولایت کې ترویج کړي ترڅو د کوکنارو د کرکيلې مخه ونیول شي.
د کرنې، اوبولګولو او مالدارۍ وزارت دهلمند ترڅنګ په نورو ولایتونو کې هم د مرخېړي د کرکېلي د ترویج په پار هڅې کوي؛ د کرنې، اوبولګولو او مالدارۍ وزارت له خوا د مرخېړیو د پالنې لسګونه مرکزونه جوړ شوي دي. ددغو مرکزونو د جوړلو موخه د مېرمنو او بېوزلو کورنیو اقتصادي ودې ته زمینه برابرول دي.