ننګرهار کې پر ۲۰۰ بزګرانو د کرکېلي اړونده توکي ووېشل شول
۶ زمری ۱۳۹۸
د کرنې، اوبولګولو او مالدارۍ وزارت ددې وزارت له دویم ملي لومړیتوب څخه د ملاتړ برنامې « SNapp2» له لارې د ننګرهار د ۷ ولسوالیو پر ۲۰۰ بزګرانو د کرکېلي اړونده توکي وېشلي دي.
د ننګرهار د کرنې رییس انجنیر سمیع الله نصرت وویل، د کرکېلي دغه توکي چې ټولیز ارزښت یې یو میلیونه افغانۍ ده، د ننګرهار ولایت د «سرخرود، بهسود، کامه، مهمندره، ګوشته، کوزکونړ او دره نور) ولسوالیو پر هغو ۲۰۰ بزګرانو وېشل شوي دي، چې د کتار په ډول یې د شولو کرکېله کړي.
په هغه غونډه کې، چې په همدې موخه جوړه شوې وه د ننګرهار ولایت د ټولنیزو چارو مرستیالې اغلی حبیبه کاکړ په دې ولایت کې دکرنې وزارت د کړنو ستاینه وکړه او غوښتنه یې وکړه، چې په دې ولایت کې مېرمنو ته په کور د ننه د کرنیزو توکو او سبو د پروسس زمینه برابره شي ترڅو مېرمنې له دې لارې خپل ورځنۍ اړتیاوې پوره کړي.
ددغو مرستو موخه د بزګرانو ملاتړ او د دوی اقتصاي پیاوړتیا ته زمینه برابرول دي.
