ننګرهار کې سږکال د مېوو ۱۸۶۲ جریبه نوي بڼونه جوړ شوي دي
۱۷مرغومې ۱۳۹۹
د ننګرهار د کرنې، اوبولګولو او مالدارۍ ریاست چارواکي وایي، چې سږ کال یې په یاد ولایت کې د بڼوالۍ د پراختیا په پار بڼوالو ته ګڼ شمیر نوي بڼونه جوړ کړي دي.
د ننګرهار دکرنې، اوبولګولو او مالدارۍ رییس انعام الله صافی وایي، د کرنې وزارت د بڼوالۍ او مالدارۍ ملي پروژې او نورو همکارو پروژو په همکارۍ یې ننګرهار کې سږکال د مېوو ۱۸۶۲ جریبه نوي بڼونه جوړ کړي دي، چې په دغو بڼونو کې د نورو بڼونو ترڅنګ د سټروسو بڼونه هم شامل دي.
د دغو جوړ شویو بڼونو تر څنګ بڼوالو ته روزنیزو پروګرامونه په لاره اچول شوي دي، د بڼوالۍ اړوند توکي او کیمیاوي سرې هم پر بڼوالو وېشل شوي دي.
د ننګرهار د کرنې ریاست هلې ځلې کوي، چې په یاد ولایت کې په مسلکي ډول د مېوو بڼونه جوړ او بڼوالو ته د عملي او نظري زده کړو زمینې په برابرولو سره وکولی شي یاد ولایت د مېوو له پلوه ځان بسیاینې ته نږدې کړي.
