ننګرهار کې د ځنګلونو د پراختیا او ساتنې په پار قومي مخورو سره تړون لیکونه لاسلیک شول

۲۳ چنګاښ ۱۴۰۰
د ننګرهار دکرنې، اوبولګولو او مالدارۍ ریاست چارواکي وایي، چې یاد ریاست له خوا ددې ولایت د ګوشتې، کوټ او کوزکونړ ولسوالېو په دوه زره او ۵۵۰ هکټاره شاړو ځمکو کې د بېرو، پلوڅو، ګلبید، صبر او ناجو ځنګلونه جوړېږي، چي د ساتنې په موخه یې له ولسي خلکو سره  تړون لیکونه لاسلیک شول.
په دې اړه جوړه شوې غونډه کې د ننګرهار مرستیال والي پوهنوال ببرک میاخېل د ځنګلونو او نورو طبیعي زېرمو په ساتنه کې ولسي ونډه خورا مهمه وبلله او ولسي خلکو څخه یې د ځنګلونو په ساتنه کې دهمکارۍ غوښتنه وکړه.
په همدې حال کې د ننګرهار د کرنې، اوبولګولو اومالدارۍ رییس انجنیر انعام الله صافی وویل، چې په ګوشتې او کوټ ولسوالیو کې د دولت د ٣١ مېلیونه، ٤١٧ زره او ٢٨٦  افغانیو په ارزښت  دوه زره  او ٥٠٠  هکټاره د بېرو او پلوڅو ځنګلونه او په کوزکونړ ولسوالۍ کې د کرنې وزارت د اقلیمي بدلون له کبله د رامنځته کېدونکو ګواښونو د کمولو پروژې CDRRP  له لورې د ١١  مېلیونه افغانېو په ارزښت ٥٠ هکټاره د بېرو، پلوڅو، ګلبېد، صبر  او ناجو ځنګلونه جوړوي .
صافي وویل، چې ددې ځنګلونو له پاره په ګوشته او کوټ ولسواليو کې ٢٠ د اوبو څاه ګانې او ٨٠  د اوبو زېرمه کولو ډنډونه جوړوي ترڅو د ځنګلو د اوبوخور په برخه کې ستونزې پیدانشي.
په دې غونډه کې د ولسوالیو قومي مخورو او ولسونو څخه د سیمه ییزو او  ولایتي چارواکو په شتون کې د ځنګلونو د ساتنې ژمنې واخیستل شوې. ولسي استازو هم په دې برخه کې د هر راز همکاریو ډاډ ورکړل او په پاې کې ولسي او قومي مخورو سره د ځنګلونو د ساتنې تړون لیکونه د مسولینو په شتون کې لاسلیک شول.