ننګرهار کې د افغانستان د کلیو بیا ودانولو مؤسسې له لورې د غنمو ۱۲۰ ننداریزې کروندې کرل شوي

 ۲۲ مرغومی ۱۴۰۳ھ.ش
۱۱ رَجَب المُرَجَّب ۱۴۴۶ه‍.ق 
د ننګرهار د کرنې، اوبو لګولو او مالدارۍ ریاست سره په همغږۍ د افغانستان د کلیو بیا ودانولو مؤسسې له لورې د ننګرهار مرکز په ګډون یوولسو ولسوالیو کې د غنمو ۱۲۰ یو جریبه ننداریزې کروندې کرل شوي دي.
د افغانستان د کلیو بیا ودانولو مؤسسې د کرنې برخي مسؤل انجینر فضل الحق وفا وویل، چې د مرکز په ګډون دننګرهار یوو لسو ولسوالېو چپرهار، رودات، کوټ، بټي کوټ، شینوارو، سپین غر، دوربابا، سره رود،کامه، کوزکونړ او نازیانو کې ننداریزې قطعې کرل شوي.
ښاغلي وفا زیاته کړه، چې په هر ولسوالی کې ۱۰ ننداریزې کروندې کرلي، چې موخه یې د غنمو کتاري کرنې ترویج، ډېر حاصل ترلاسه کول او د خوړو خوندیتوب رامنځته کول دي.
دغه راز یاده موسسه په یادو ولسوالیو کې دملګرو ملتونو د کرنې او خوړو ادارې په مالي لګښت ۱۸ زره او ۸۰۰ بزګرانو ته د غنمو اصلاح شوي تخمونه او کیمیاوي سرې هم وېشلي دي.