میدان وردګو کې د کرنې او مالدارۍ د پیاوړتیا په موخه پراختیايي او روغتیايي فعالیتونه روان دي

mail-admin
دوشنبه ۱۴۰۵/۷/۲۰ - ۱۴:۲۸
میدان وردګو کې د کرنې او مالدارۍ د پیاوړتیا په موخه پراختیايي او روغتیايي فعالیتونه روان دي

۲۰ تله ۱۴۰۵ هـ.ش
۲۹ رَبِیعُ الْثاني ۱۴۴۸ هـ.ق
د میدان وردګو ولایت د کرنې، اوبو لګولو او مالدارۍ ریاست له لوري د دغه ولایت د مرکز په ګډون په بېلابېلو ولسوالیو کې د یوې همکارې مؤسسې د روانو فعالیتونو او پراختیايي پروژو د پلي کېدو بهیر وڅارل شو.
د دې څارنې په ترڅ کې د مالدارۍ د پراختیا، د اوبو د سرچینو د برابرولو او د څارویو د روغتیا ساتنې په برخو کې د یادې مؤسسې ترسره شوي او روان فعالیتونه وارزول شول.
د معلوماتو له مخې، د میدان وردګو ولایت د نرخ ولسوالی د لوی شاه کابل په سیمه کې، چې تر دې وړاندې د اوبو د یوه حوض د جوړولو لپاره سروې ترسره شوې وه، د سروې د پایلو پر بنسټ د حوض د جوړولو ځای ټاکل شوی او اوسمهال یې رغنیزې چارې په اساسي ډول روانې دي. ټاکل شوې ده، چې د دغه حوض چارې په نږدې راتلونکي کې بشپړې او ګټې اخیستنې ته وسپارل شي.
د یاد حوض له جوړېدو سره به شاوخوا ۸۰ کورنۍ د اوبو له اسانتیاوو برخمنې شي. له دې حوض څخه به د خلکو د څښاک، د څارویو د اوبو اړتیاوو او کرنیزو فعالیتونو لپاره ګټه واخیستل شي. دغه راز، له سیمې څخه تېرېدونکي کوچیان به هم وکولای شي د خپلو اوبو اړتیاوې ترې پوره کړي.
بلخوا، د مالدارۍ د ملاتړ او د څارویو د ناروغیو د مخنیوي په موخه ټاکل شوې، چې د روانې میاشتې په ترڅ کې د میدان وردګو ولایت د مرکز په ګډون په تر پوښښ لاندې ولسوالیو کې ۵۲۰ مالدارانو ته د څارویو د بېلابېلو ناروغیو، د هغو د مخنیوي او د څارویو د روغتیا ساتنې په اړه د عامه پوهاوي پروګرامونه ترسره شي.
همدارنګه، د یاد پروګرام په ترڅ کې به یو شمېر څاروي د ساري او نورو ناروغیو د مخنیوي په موخه واکسین شي، څو د څارویو د ناروغیو د خپرېدو مخه ونیول شي او د مالدارانو اقتصادي زیانونه راکم شي.
د یادونې وړ ده، چې د اوبو د سرچینو برابرول، د څارویو د روغتیا ساتنه او د مالدارانو د مسلکي پوهاوي لوړول د کرنې او مالدارۍ د دوامدارې پراختیا له مهمو اړتیاوو څخه دي. په ځانګړي ډول په هغو سیمو کې چې خلک یې پر کرنه او مالدارۍ متکي دي، د اوبو زېرمو جوړول او د وترنري خدمتونو پراخول د کلیوالو کورنیو د اقتصادي وضعیت په ښه والي کې مهم رول لري.
د میدان وردګو د کرنې، اوبو لګولو او مالدارۍ ریاست د همکارو مؤسسو د فعالیتونو د څارنې او همغږۍ له لارې هڅه کوي، چې پراختیايي پروژې د خلکو له اړتیاوو سره سم پلې شي، د مالدارانو ستونزو ته رسېدنه وشي او د کرنې او مالدارۍ د ودې لپاره لازمې اسانتیاوې برابرې شي.

تازه ترین اخبار

شنبه ۱۴۰۵/۸/۳۰ - ۱۶:۱۳
Background image

ننګرهار کې ۱۰۰ تنو د ستروسو او سبو پروسس کوونکو ته د ۲.۶ میلیونه افغانیو په ارزښت وسایل ووېشل شول

۳۰ لړم ۱۴۰۵ هـ.ش
۱۰ جُمَادَى الثانی ۱۴۴۸ هـ.ق
د ننګرهار ولایت د کرنې، اوبو لګولو او مالدارۍ ریاست په هڅو، د «ډاکار» مؤسسې په تخنیکي همکارۍ او د ملګرو ملتونو د نشه‌یي توکو او جرمونو سره. . .

چهارشنبه ۱۴۰۵/۸/۶ - ۱۱:۵
Background image

نورستان کې سلګونو اړمنو بزګرانو ته د اصلاح شویو تخمونو او کیمیاوي سرو د وېش لړۍ پیل شوه

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د نورستان ولایت د کرنې، اوبو لګولو او مالدارۍ ریاست په همغږۍ، د خوړو او کرنې نړۍوالې ادارې «اف‌اې‌او» په مالي ملاتړ او د «اې‌وای‌اس‌او» مؤسسې. . .

چهارشنبه ۱۴۰۵/۸/۶ - ۹:۳۰
Background image

ننګرهار کې د غنمو ننداریزو کروندو لپاره اصلاح شوي تخمونه او کیمیاوي سرې ووېشل شوې

۶ لړم ۱۴۰۵ هـ.ش
۱۶ جُمَادَى الأول ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست په تخنیکي همکارۍ او د کرنې وزارت په مالي ملاتړ، د دغه ولایت په اوو ولسوالیو کې د غنمو ننداریزو. . .

بازگشت