فراه او هلمند ولایتونو کې د کرنې او مالدارۍ له شرکتونو او ټولنو څخه د کرنې وزارت د پلاوي لیدنه
۴ سلواغه ۱۴۰۴ه.ش
۵ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د خصوصي سکتور د پراختیا ریاست یو پلاوی د دغه ریاست د رییس قاري محمد اکبر امیني په مشرۍ، په فراه او هلمند ولایتونو کې د کرنیزو او مالدارۍ محصولاتو د تولیدي شرکتونو، کوپراتیفونو او فعالو کرنیزو ټولنو د لیدنې په موخه یادو ولایتونو ته سفر وکړ.
یاد پلاوي د خپل سفر په ترڅ کې په هلمند او فراه ولایتونو کې د چرګانو د روزنې ټولنې، د اوړو مېل، د کبانو د روزنې اتحادیې، د چرګانو د روزنې ټولنې، د اصلاح شوو تخمونو د تولید شرکت، د عینزي کرنیز کوپراتیف، د چهارباغ اتحادیه، د نیالګیو روزونکو ټولنه او د شاتو فارم څخه لیدنه وکړه.
د دې لیدنو پر مهال، پلاوي د شرکتونو او ټولنو له فعالیتونو او موخو سره د بلدتیا تر څنګ، د هغوی ستونزې واورېدې او د چارو د ښهوالي او د کرنیزو او مالدارۍ محصولاتو د تولید په برخه کې د پانګونې د تشویق لپاره یې لازمې مشورې وړاندې کړې. همدارنګه، هغوی ته د افغانستان اسلامي امارت د ملاتړ او همکارۍ ډاډ هم ورکړل شو.
دغه اقدام په هېواد کې د کرنې او مالدارۍ د پراختیا او د متشبثینو د ځانبسیاینې د لارې د پیاوړتیا په موخه ترسره شوی دی.
