سږ کال د کندهار له لارې د انارو صادرات ۲۲ زره ټنو ته رسېدلي
د کندهار د کرنې، اوبو لګولو او مالدارۍ ریاست د معلوماتو پر بنسټ، د ۱۴۰۴ هـ.ل کال په اوږدو کې له کندهار څخه بهرنیو هېوادونو ته د انارو صادراتو کچه د پام وړ لوړه شوې ده. د کندهار دکرنې ریاست د کرنیزو چارو د آمریت د رپوټ له مخې، تر دې دمه ۲۱ زره او ۸۷۰ ټنه انار صادر شوي چې د تېر کال په پرتله ستر پرمختګ بلل کېږي.
د کندهار دکرنې ریاست د کرنیزو چارو آمر، انجنیر ایمل حکیمي وایي چې د انارو د صادراتو بهیر د کندهار د کرنې ریاست، د سوداګرۍ او پانګونې خونې په همغږۍ او د افغان ملي سوداګرو په مالي ملاتړ ترسره شوی دی. د ده په وینا، کندهاري انار سږ کال تر ډېره مالیزیا، روسیې، پاکستان او ازبکستان ته صادر شوي دي.
مسؤولین وايي چې د اسلامي امارت پالسي د صادراتو پراختیا او د وارداتو د کمولو پر بنسټ ولاړه ده. د همدې هڅو په نتیجه کې، د کندهار د انارو صادراتو کچه چې تېر کال یوازې شاوخوا ۷ زره ټنه وه، سږ کال په بېساري ډول لوړه شوې او نږدې ۱۵ زره ټنه زیاتوالی یې موندلی دی.
سوداګر او کرنیز مسئولین دا پرمختګ د کندهار د کرنیزو محصولاتو لپاره د نړۍوال بازار د پراخېدو مهم ګام بولي او هیله څرګندوي چې د صادراتو بهیر به لا هم پیاوړی شي.
