روزګان کې د بارانسنج آلې د نصب او فعالولو روزنیز پروګرام دایر شو
۳۰ زمری ۱۴۰۴ هـ.ش
۲۷ صَفَر المُظَفَّر ۱۴۴۷ هـ.ق
د روزګان ولایت د کرنې، اوبولګولو او مالدارۍ ریاست د کرنې وزارت له کارکوونکو سره په همکارۍ د «د بارانسنج آلې د نصب او فعالولو طریقه» تر سرلیک لاندې یوورځنی روزنیز پروګرام د یاد ولایت د ولسوالیو د کرنیزو خدماتو مدیریتونو کارکوونکو لپاره ترسره کړ.
په دغه پروګرام کې ګډونوالو ته د بارانسنج آلې د نصب او فعالولو څرنګوالی، همدارنګه د باران د ثبتولو طریقه په میاشتني، ربعوار او کلني ډول هم په عملي او هم په نظري بڼه وروښودل شوه.
مسؤلینو له ګډونوالو وغوښتل، چې له دغو وسایلو څخه په اغېزمنه توګه ګټه واخلي، د باران د ثبت شوې شمېرې پر وخت ثبت او په آنلاین بڼه د کرنې وزارت مرکز ته د یووالي او استولو په موخه شریکې کړي.
د پروګرام په پای کې هر یوه ګډونوال ته یوه د بارانسنج آله وویشل شوه، څو د موسمي بارانونو د کره ثبت لپاره ترې ګټه واخلي.
