د کندهار کوهکران څېړنیز فارم د بڼ مېوو ښه روزني په پار هڅې
۶ سلواغه ۱۴۰۴ه.ش
۷ شَعبان المُعَظّم ۱۴۴۷ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د کوهکران څېړنیز فارم مسلکي انجنیرانو له لوري د یاد فارم د انارو بڼ ښه روزني لپاره د کیمیاوي سرې د علاوه کولو چارې پیل شوي دي.
د کوهکران څېړنیز فارم انجنیر محمدعارف عرفان وایي، چې دا مهال د انارو په ملي کلکسیون کې د هرې ونې لپاره ۵۰۰ ګرامه توره سره د ژمي موسم په راتګ سره ورکول کېږي، چې موخه یې د ونو د ودې ښهوالی، د خاورې نرمول او د حاصلاتو کیفیت لوړول دي. د نوموړي په وینا، یادې چارې به د درې میاشتو په موده کې بشپړې شي.
همدارنګه د یاد فارم د بڼوالۍ برخې مسؤل، عبدالقدوس بارکزی وایي، چې د سرې له علاوه کولو مخکې د فارم د ټولو ونو ښاخبرۍ ترسره شوې ده او دا مهال یې دویمه مرحله د راتلونکي کال لپاره د مېوې زیاتوالي او د کیفیت د ښهوالي په موخه پیل شوې ده.
بلخوا د تیلي او صنعتي نباتاتو مسؤل انجنیر نصیبالله آغا د کوهکران څېړنیز فارم روانې چارې تر بل هر وخت غوره بولي او وایي، چې د نوې رهبرۍ تر راتګ وروسته د فارم فعالیتونه پر وخت او په ښه مدیریت سره تنظیم شوي دي.
د یادونې وړ ده، چې په کندهار کې پنځه څېړنیز او روزنیز فارمونه موجود دي؛ چې له ډلې یې په کوهکران څېړنیز فارمونو کې پر بېلابېلو میوو، سبو او نوروزي څېړنیز فارم کې پر صنعتي، تیلي او اګرونومیکو نباتاتو څیړنې رواني دي او د ژړۍ په ترویجي فارم کې بیا بېلابېل نیالګي روزل کېږي. دا مهال د یادو ټولو فارمونو چارې په اغېزمن، منظم او پر وخت ترسره کېږي.
