د کندز ولایت بزګرانو ته د سبو تخمونو، کیمیاوي سرو او کرنیزو وسایلو وېش
۲۹ سلواغه ۱۴۰۴ه.ش
۱ رَمَضانُ المُبارَک ۱۴۴۷ه.ق
د بزګرانو د ملاتړ، د کرنیزو تولیداتو د پیاوړتیا او د بزګرو کورنیو د معیشت د ښه والي په موخه، د کندز ولایت ۴۵۰ تنو بزګرانو ته د سبو اصلاح شوي تخمونه، کیمیاوي سرې او اړین کرنیز توکي ووېشل شول.
دغه مرسته د کندز دکرنې ریاست په همغږۍ د ډاکار دفر له خوا پر مستحقو بزګرانو وېشل شوي دي.
د وېش دغه بهیر دکندز ولایت د چهاردرې، قلعه ذال ولسوالیو او د مرکز کندز په مرکز کې په شفاف او منظم ډول تطبیق شو، او مستحق بزګران د مخکېنۍ پېژندنې له لارې له یادو مرستو څخه برخمن شول.
د دې پروګرام موخه د سبو د حاصلاتو زیاتوالی، بزګرانو ته د اصلاح شوو تخمونو او معیاري کیمیاوي سرو کارولو ته هڅونه، او د هغوی د تخنیکي وړتیاوو پیاوړتیا ده.
د کندز ولایت د کرنې، اوبولګولو او مالدارۍ ریاست د وېش له بهیر څخه د نظارت تر څنګ، د وېشل شوو توکو د سم او پر وخت کارولو پر ارزښت ټینګار وکړ او دا یې د کرینزو ځانبسیاینې او د سیمهییز اقتصاد د ودې په لور یو اغېزمن ګام وباله.
د یادونې وړ ده، چې بزګرانو د دفتر ډآکار له همکاریو او د کندز ولایت د کرنې، آبیارۍ او مالدارۍ ریاست له دوامدارو ملاتړونو څخه مننه وکړه او په راتلونکې کې یې د ورته حمایوي پروګرامونو د دوام غوښتنه وکړه.
