د کرنې وزیر د مالیې وزارت له چارسمبال وزیر سره د قزاقستان د سوداګریزو همکاریو د هوکړې پر پلي کولو خبرې وکړې
۵ لیندۍ ۱۳۹۸
د کرنې، اوبولګولو او مالدارۍ وزیر نصیر احمد درانی او د مالیې وزارت چارسمبال وزیر او د زېربنا په چارو کې د جمهوري ریاست د عالي مقام ستر سلاکار محمد همایون قیومي د مالیې په وزارت کې ولیدل او قزاقستان سره د سوداګریزو همکاریو پر هوکړه لیک خبرې اترې وکړې.
په دې لیدنه کې دواړو خواوو د جنس په جنس سیستم له لارې قزاقستان هېواد ته د افغانستان د تازه مېوو او سبو د صادرولو په بدل کې له قزاقستان څخه افغانستان ته د غنمو او د تخمونو د واردولو او همدا راز د افغانستان د ټرانسپورټي او ټرانزیټي توکو صادرولو په وړاندې د ستونزو او ننګونو پرتشخیص خبرې اترې وکړې.
باید وویل شي، چې د افغانستان او قزاقستان ترمنځ د اقتصادي او سوداګریزو همکاریو په هوکړ لیک کې د جنس په جنس سیستم له لارې د افغانستان د سبو او تازه مېوو د صادرولو په بدل کې له هغه هېواد څخه د غنمو او د تخمونو را واردولو یادونه شوې ده.
