د کرنې وزارت د کارکوونکو چارو نوی رییس معرفي شو
۵ سلواغه ۱۴۰۴ه.ش
۶ شَعبان المُعَظّم ۱۴۴۷ه.ق
مولوي شمسالله محمد د کرنې، اوبو لګولو او مالدارۍ وزارت د کارکوونکو چارو ریاست د نوي رییس په توګه د یو لړ مراسمو په ترڅ کې، چې د کرنې او مالدارۍ سکتور د یو شمېر رییسانو او سلاکارانو په حضور کې جوړ شوي وو، معرفي شو.
په یادو مراسمو کې لومړی د قرآنکریم څو مبارک آیتونه تلاوت شول، وروسته د کرنې وزارت د دفتر رییس ملا محمدحسین خورشید احمد وینا وکړه. نوموړي د وړ، ژمن او مسلکي کسانو ګمارنه د اسلامي امارت د اساسي اصولو څخه وبلله او ټینګار یې وکړ، چې د وړتیا لرونکو کارکوونکو ګمارنه کولی شي د عدالت په تأمین او د اغېزمنو خدمتونو په وړاندې کولو کې مهم رول ولوبوي.
د کرنې، اوبو لګولو او مالدارۍ وزارت د دفتر رییس همدارنګه وویل، چې دا وزارت یو خدماتي اداره ده او هڅه کېږي، چې په بېلابېلو برخو کې لوستي، متخصص او مسلکي کسان وګمارل شي، تر څو بزګرانو او مالدارانو ته لا ښه او اغېزمن خدمتونه وړاندې شي.
وروسته، حاضرو رییسانو مولوي شمسالله محمد تر خپل کاري دفتر پورې بدرګه کړ او نوموړی یې کارکوونکو ته ور وپېژانده.
مولوي شمسالله محمد تر دې وړاندې د عشر او زکات په لوی ریاست، د خصوصي سکتور د پراختیا ریاست، د ترانسپورت ریاست او همدارنګه د اوبو لګولو اوقدرتي سرچینو د معینیت د سلاکارۍ په برخه کې دندې ترسره کړې دي.
