د څېړنو لوی ریاست څخه په لیدنه کې د کرنې وزیر: څېړنې، دکرنې زړه ده

۱۹ سلواغه ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي، د یاد وزارت د څېړنو لوی ریاست او د نباتاتو د خوندیتوب ریاست څخه، چې د بادام باغ په څېړنیز فارم کې دي لیدنه وکړه.
په دې لیدنه کې، د کرنې وزارت د څېړنو لوی ریاست مشره نجیبه عطایي، په تېر مال کال کې ددې ریاست د کړنو او لاسته راوړنو په هکله ښاغلی احدي ته مالومات وړاندې کړه او دغه راز د ۱۴۰۰ ام کال پلانونه یې د کرنې له وزیر سره شریکه کړه.
مېرمن عطایي وویل: «د وزارت د مشرتابه د ملاتړ او د څېړنې د برخې د کارکوونو د فعالیتونو له امله، تر دې دمه د هېواد په بېلابېلو ولایتونونو کې ۲۲ لوی څېړنیز فارمونه فعال دي، چې د کرنیزو محصولاتو په زیاتوالي کې رغنده رول لري.»
د کرنې وزارت د څېړنیو لوی ریاست مشره دغه راز وویل، چې د څېړنیزو فارمونو زیاتوالي د دوی په برنامه کې دي، او په ۱۴۰۰ ام کال کې هلې ځلې کوي، چې په یوشمېر نورو ولایتونو کې هم یوشمېر څېړنیز فارمونه جوړ کړي.
په همدې حال ښاغلی احدي د کرنې په سکټور کې څېړنه مهمه وبلل او ویې ویل: «څېړنې د کرنې زړه ده، او موږ د کرنې په بېلابېلو برخو کې د لا ډېرو څېړنو په ترسره کولو سره کولی شو، چې پرمختګ وکړو او خپل کرنیز محصولات زیات کړو، ترڅو ورسره د کرنیزو محصولاتو د تولیدوونکو ژوند چې بزګران دي مثبت بدلون وکړي او د ملي اقتصاد په پیاوړتیا کې لا ډېره ونډه واخلو.»
د کرنې وزیر دغه راز د خاورې پېژندنې، د نباتي ناروغیو د تشخیص او د مېوو لابراټوارنو څخه هم لیدنه وکړه.