د خوست ځاځي میدان ولسوالۍ کې د ۴۰زره او ۵۰۰ چارمغزو نیالګیو کېنولو پروژه دوام لري
۴ وری ۱۴۰۴ ه.ش
۲۴ رَمَضانُ المُبارَک ۱۴۴۶ه.ق
په خوست ولایت کې د ۴۰زره او ۵۰۰ چارمغزو د نیالګیو کېنولو د پروژې چارې په منظمه توګه روانې دي. یاده پروژه د خوست ولایت د کرنې، اوبو لګولو او مالدارۍ ریاست تر چتر لاندې، د ځاځي میدان ولسوالۍ د کرنیزو چارو عمومي مدیریت په نظارت او د افرین مؤسسې په همکارۍ پلي کېږي. د دې پروژې ۸۵ سلنه کارونه بشپړ شوي دي.
یاده پروژه د ځاځي میدان ولسوالۍ د مغل خیلو کلي په غرنۍ سیمه کې تطبیق کېږي، چې کارونه یې له مخکې پیل شوي دي. په دې پروژه کې شاوخوا ۶۰۰ کاریګر په کار بوخت شوي او په درې مرحلو کې تطبیق کېږي. تر دې دمه یې دوې مرحلې بشپړې شوې دي او د درېیمې مرحلې کار یې دوام لري.
لومړنۍ مرحله یې د ۴۰زره او ۵۰۰ کندو کېندل و، چې هرې کندې ۳ متره اوږدوالی، ۸۰ سانتيمتره سور او ۴۰ سانتيمتره ژوروالی لاره او نږدې ۵۰ ورځو کې بشپړه شوه.
دویمه مرحله یې په کېندل شویو کندو کې د نیالګیو لپاره د غوچکو کیندل و، چې نږدې ۲۵ ورځې یې دوام درلود. درېيمه مرحله یې هم دا مهال روانه ده، چې پکې د نیالګیو کېنولو چارې ترسره کېږي، او د مختلفو سیمو څخه نیالګي ورته انتقالېږي.
یاده پروژه د ځاځي میدان ولسوالۍ د کرنیزو شتمنیو د پراختیا لپاره مهمه ګڼل کېږي، چې د سیمې اقتصاد ته هم ګټه رسوي.
