د خوراکي توکو په برخه کې د افغانستان او ازبیکستان د متشبثینو ترمنځ د سوداګریزو قراردادونو لاسلیک
د ازبیکستان پلاوی د هغه هېواد د کرنې وزارت د مرستیال جمشید عبدوذوکروف په مشرۍ، چې د خصوصي سکتور د استازو او دولتي چارواکو په ملتیا افغانستان ته راغلی و، د خپلو کاري لېدنو په پای کې د افغانستان د کرنیزو متشبثینو او خصوصي سکتور سره څو سوداګریز قراردادونه لاسلیک کړل.
یاد قراردادونه د دواړو هېوادونو د حکومتي مسؤلینو په حضور کې لاسلیک شول، چې اساسي محور یې د خوراکي توکو د صادراتو او وارداتو په برخه کې د همکاریو پراختیا ده، چې پکې د سبو، غوښه او نور غذایي محصولات شامل دي. د یادو هوکړو له مخې، دواړه لوري ژمن شول، چې د دواړو هېوادونو د نافذه اصولو او مقرراتو سره سم به خپلې سوداګریزې اړیکې پراخې کړي او د صادراتي او وارداتي توکو د لېږد رالېږد بهیر به لا پیاوړی کړي.
د یادونې وړ ده، چې د افغانستان اسلامي امارت د کرنې، اوبو لګولو او مالدارۍ وزارت په دې وروستیو کې په آزمایشي ډول له دولتي او خصوصي مسلخونو څخه بهر ته د څارويو د غوښې د صادرولو اجازه ورکړې ده، چې دا به د مالدارۍ په برخه کې د سوداګرۍ او پانګونې د ودې لپاره نوي فرصتونه رامنځته کړي.
دا قراردادونه د افغانستان او ازبیکستان ترمنځ د اقتصادي همکاریو د پراختیا او د دواړو هېوادونو د خصوصي سکتور لپاره د لا زیاتو فرصتونو د برابرولو په لور یو مهم ګام ګڼل کېږي.
