د حصارک سېلاب ځپلو سره د مرستې په پار ټینګار
۱۲ چنګاښ ۱۴۰۲ه.ش
۱۵ ذیالحِجّة ۱۴۴۴ ه.ق
د ننګرهار دکرنې، اوبولګولو او مالدارۍ ریاست وایي، چې ددې ولایت د حصارک ولسوالی په یولسو کلیو کې سېلابونو بزګرانو ته ګڼ مالي او ځاني زیانونه اړولي دي.
د چارواکو په خبره د حصارک ولسوالی په غوږیزي، څپلي ژور، سردارخېل، علي شیر، کبلو کڅ، خنګي کلي، منه خېل، سرو کلي، رود ظریف خېل، رود ناور او رود اسیاب کې ۲۱۰ جریبه کرنیزه ځمکه تخریب او د غنمو، آلوګانو او لوبیا فصلونه یې له منځه وړي .
دغه راز ۱۴ کانالونه او ۳۰ د اوبو سربندونه هم په بشپړ ډول له مینځه تللي دي، او هغه فصلونه چې د ددی سربندونو او ويالو په وسیله اوبه کیدلې د سربندونو ویجاړیدو له کبله د منځه تلو په حال کې دي.
په ورته وخت کې د ننګرهار د حصارک ولسوالی د خنګي کلي کې دوه تنو ژوند بایللي چې یوه یې نارینه او بله ښخینه پکي هم شامله ده .
د ننګرهار دکرنې ریاست دکرنې او مالدارۍ په برخه کې د فعالو مؤسسو له مسوولینو غوښتنه کړې، چې ددې ولایت له سېلاب ځپلو سره دې بېړنۍ مرستې وکړي.
په دې وروستیو کې د هېواد په یوشمېر ولایتونو کې سېلابونه د مالي او ځاني زیانونو لامل شوي دي. د ا.ا.ا امارت په ځانګړې توګه دکرنې، اوبولګولو او مالدارۍ وزارت په کچه هلې ځلې کوي، چې د سېلابونو د زیانونه مخنیوي ترڅنګ له سېلاب ځپلو سره بېړنۍ اړینې مرستې وکړي، ترڅو د لوی ناورین مخنیوی ووشي.
