د بلخ زاري ولسوالی کې له څه باندې ۴۰۰ راستنو شويو کډوالو سره نغدي مرستې ترسره شوې
۲۹ سلواغه ۱۴۰۴ه.ش
۱ رَمَضانُ المُبارَک ۱۴۴۷ه.ق
د بلخ ولايت د زاري ولسوالی کې له کډوالۍ راستنو شويو ۳۰۰ اړمنو کورنيو سره د نغدي مرستې دویم پړاو عملي شو. دغه مرستې د «ډبلیواچاچ» مؤسسې په مالي ملاتړ او د زاري ولسوالی د کرنيزو خدمتونو عمومي مديريت په همغږۍ ووېشل شوې، چې له مخې يې هرې کورنۍ ته ۲۶۳۰ افغانۍ ورکړل شوې او د وېش له بهير څخه منظمه څارنه هم ترسره شوه.
همدارنګه، ۱۰۹ هغو کورنيو ته چې په ۲۰۲۵ زېږدیز کال کې له ایران څخه تازه ايستل شوې وې او مخکې يې د هرې کورنۍ لپاره ۹۹۸۵ افغانۍ ترلاسه کړې وې، په دویم پړاو کې د هرې کورنۍ لپاره ۹۸۶۵ افغانۍ نغدي مرسته ووېشل شوه.
د يادې څارنې اساسي موخه د مرستو د وېش په بهير کې د روڼتيا تأمين، د اړمنو کورنيو حالت ته رسېدنه او د راستنو شويو کډوالو ملاتړ ياد شوی، څو مرستې په سم ډول او د ټاکل شويو اصولو له مخې مستحقو کسانو ته ورسېږي.
دا په داسې حال کې ده، چې د کرنې، اوبو لګولو او مالدارۍ وزارت له لوري د هېواد په کچه له راستنېدونکو کډوالو سره د غنمو او نغدو پيسو د وېش لړۍ روانه ده او په بېلابېلو ولايتونو کې زرګونو اړمنو کورنيو ته مرستې رسول شوې دي.
