د باراني اوبو مهار په پار هڅې؛ د کندهار ژړۍ کې د نوي چکډېم چارې ۵۰ سلنه بشپړ شوې
۱۲ سلواغه ۱۴۰۴ه.ش
۱۳ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت په پراختیايي بودیجه، د کندهار د کرنې، اوبو لګولو او مالدارۍ ریاست تر رهبرۍ لاندې د کندهار د ژړۍ ولسوالی د باغ عمري په سیمه کې د ۶ میلیونه افغانیو په ارزښت د یوه نوي چکډېم جوړولو چارې پیل شوي، چې رغنیزې چارې یې تر دې مهاله ۵۰ سلنه بشپړې شوي دي.
د کندهار دکرنې ریاست چارواکي وایي، چې یاد چکډېم به په نږدې راتلونکې په معیاري او لوړ کیفیت سره جوړ او ګټې اخیستنې ته وسپارل شي، چې په جوړېدو سره به یې د سیمي خلکو لپاره شاوخوا ۵۰ زره متره مکعب اوبه ذخیره کړي.
د چکډېمونو د جوړولو موخه د باراني اوبو مهار او زېرمه کول، د ځمکې لاندې د اوبو سطحه راپورته کول، د سېلابونو د زیانونو مخنیوی، د بزګرانو او مالدارانو د اوبو ستونزو کمول او د وچکالۍ پر وړاندې مبارزه ده.
د یادونې وړ ده، چې اوس مهال د کندهار په کښته شاولیکوټ ولسوالی کندلانو سیمه کې هم یو ستر چکډېم د څه باندې ۱۸.۵ میلیونه افغانیو په ارزښت جوړېږي.
