د اړوندو بنسټونو د استازو په شتون کې افغانستان ته د زعفرانو د قاچاق د مخنیوي د ارزونې غونډه وشوه

۲۵ لړم ۱۳۹۹
هېواد ته د زعفرانو د قاچاق د مخنیوي د څرنګوالي د ارزونې او خبرو اترو غونډه، د ملي امنیت شورا، کورنیو چارو، ماليې، صنعت او سوداګرۍ وزارتونو، د ملي امنیت لوی ریاست او د زعفران کارانو د ملي ټولنې استازو او د کرنې وزارت یوشمېر چارواکو په شتون کې؛ د کرنې وزارت نوماند او سرپرست وزیر ډاکټر انوارالحق احدي په مشری، د مقام په دفتر کې په لاره واچول شوه.
د کرنې وزارت سرپرست ډاکټر انوارالحق احدي وویل: «د زعفرانو د پراختیا د پنځه کلن ملي طرحې پر اساس د افغانستان د زعفرانو صنعت کال تر بلې د ودې په حال کې ده. د افغانستان زعفران په نړۍ کې عالی ځای خپل کړئ، دمګړۍ د تولیداتو پر زیاتوالي کارکول، د پروسس مرکزونه جوړول او تجهیز، د کیفیت د کنټرول لابراټوار جوړول، د بزګرانو روزنه، او یوشمېر نور کارونه دکرنې وزارت اساسي کړنې دي.خو د زعفرانو د سکټور په پراختیا کې د پام وړ پرمختګ ترڅنګ، لاهم یوشمېر ستونزې له ډلې، د کروندو د تولید ټیټه کچه، د پروسس او معیاري بسته بندی د مرکزونو کموالی او قاچاق هغه څه دي، چې یاد سکټور ورسره مخ دی.»
د کرنې وزارت سرپرست زیاته کړه: «ددې ترڅنګ، چې د ولسمشر د حکم پر اساس زعفران او د زعفرانو د پیازو واردات بند دي، خو بیا هم له ګاونډیو هېوادونو څخه افغانستان ته د زعفرانو د قاچاق راپورونه ورکول کیږي.»
په همدې حال کې ښاغلی احدي د مالیې له وزارت څخه وغوښت چې، په ګمرکونو کې د اسکنرونو په فعالولو کې، چې د زعفرانو د قاچاق په مخنیوی کې اغېزمن دي، همکاري وکړي. دغه راز د کرنې وزارت سرپرست له امنیتي ارګانونو څخه د وارداتي محمولو د کنټرول او د زعفرانو د قاچاق د مخنیوي په برخه کې د لاډېرو همکاریو غوښتنه وکړه.
په دې غونډه کې د بېلابېلو ادارو استازو خپل چمتووالي وښودل، چې د زعفرانو د قاچاق د ستونزې دهوارولو په برخه کې د سکټوري بنسټونو په همغږي همکاري وکړي.
باید وویل شي، چې افغانستان په ۱۳۹۸یم کال کې نږدې ۲۰ مټریک ټنه زعفران تولید کړې وه او د روان کال د راپورونو پربنسټ، د زعفرانو کروندې زره هکټاره زیات شوي دي او اټکل کیږي، چې د تېرکال په پرتله د سږني حاصلاتو کچه زیات شي.