د اوبو مدیریت د اسټراټژي چمتوکولو روزنیز پروګرام پیل شو

۲ لیندۍ ۱۳۹۸
د کرنې، اوبولګولو او مالدارۍ وزارت د بېلابېلو نړیوالو او کورنیو بنسټونو په همکارۍ، په هېواد کې د اوبو د سرچینو د تنظیم او ښه مدیرت په پار د اسټراټژي چمتوکولو روزنیز پروګرام پیل کړ.
دغه پروګرام د کرنې، اوبولګولو او مالدارۍ وزیر نصیر احمد درانی، په کابل کې د هالنډ د سفارت مرستیال هینس اکربون، په افغانستان کې د ملګرو ملتونو دخوړو او کرنې ادارې مشر راجندرا کمار اریال او د ملګرو ملتونو دخوړو او کرنې ادراې د سرچینو غړی ډاکټر ویم بستیانسن په ګډون نن رسماً پیل شو.
د یاد پنځه ورځنۍ روزنیز پروګرام په پیل غونډه کې د کرنې وزیر نصیر احمد درانی وویل، چې افغانستان لاهم د خپلو اوبیزو سرچینو د مدیریت په پار منظمه اسټراټژي نه لري او ددې اسټراټژۍ د چمتو کولو په پار د نړیوالو بنسټونو همکاریو ته اړتیا شته. هغه وویل، چې اقلیمي بدلونونو په پار افغانستان ډېر زیانمن دی. ښاغلی درانی په هېواد کې د اوبیزو سرچینو په هکله د کره معلوماتو په هکله وویل: «افغانستان په څېر هېوادونه چې د اوبیزو سرچینو په هکله یې کره معلومات نشته، ډېره اړینه خبره ده، چې اوس باید د اعتماد وړ معلومات ولرو ترڅو د معلوماتو پر بنسټ یو منظم مدیریتي پلان جوړ کړو.»
په ورته وخت کې په کابل کې دهالنډ د سفارت مرستیال هینس اکربون وویل، چې دوی د ملګرو ملتونو دخوړو او کرنې ادراې په مرسته افغانستان سره د اوبیزو سرچینو د مدیریت د یوې منظمې برنامې په جوړولو کې مرسته کوي. هغه وویل، چې کال وړاندې د افغانستان ولسمشر له هالنډه غوښتی وو، چې په دې برخه کې همکاري وکړي.