بلخ ته د کرنې وزارت د غلودانو او صنعتي بوټو د رییس سفر

۱۶ زمری ۱۴۰۴ هـ.ش
۱۳ صَفَر المُظَفَّر ۱۴۴۷ هـ.ق
د کرنې، اوبولګولو او مالدارۍ وزارت د غلودانو او صنعتي بوټو رییس، مولوي مصباح‌الدین مستعین، د یو پلاوي په مشرۍ بلخ ولایت ته سفر وکړ. یاد پلاوی د سفر په ترڅ کې د شولګرې او دهدادي ولسوالیو له بېلابېلو کروندیزو سیمو څخه مسلکي لیدنه او ارزونه وکړه.
په دغو لیدنو کې د جوارو، شولو، مۍ، پنبې او سویابین ننداریزو کروندو څخه چې د بزګرانو له لوري کرل شوي وو، د کرنیزو چارو تخنیکي څېړنه وشوه. یاده لیدنه د کرنې وزارت د همږغۍ عمومي مدیر سردار محمد قانون مل، د بلخ ولایت د کرنې، اوبولګولو او مالدارۍ ریاست د ترویج عمومي مدیر محمد حسین خان، او د اړوندو مؤسسو استازو په همکارۍ ترسره شوه.
یادې ننداریزې کروندې په یو-یو جریب ځمکه کې په خطي بڼه کرل شوې وې. د هر اړخیزې مشاهدې او ارزونې له مخې، یادو نباتاتو د دودیزې کرکېلې پرتله ښه فزیکي وده کړې او تمه ده، چې حاصلات به یې هم ان‌شاءالله ډېر او باکیفیته وي.
دا سفر د کرنیزو چارو د ارزونې، د نوې کرنې د میتودونو د ترویج، او د بزګرانو د هڅونې په موخه ترسره شوی او ټاکل شوې ده، چې د دغو تجربو پر بنسټ، کروندګرو ته لا ډېرې علمي مشورې وړاندې شي.