ننګرهار کې پر څه باندې ۱۰ زره بزګرانو د غنمو اصلاح شوي تخم او کیمیاوي سرې وېشل کېږي
۱۲ زمری ۱۴۰۲ه.ش
۱۶ مُحَرَّمُ الحَرام ۱۴۴۵ه.ق
د ننګرهارد کرنې، اوبولګولو او مالدارۍ ریاست سره په همغږۍ د ننګرهار په ۱۰ ولسوالیو کې ۱۰ زره او ۲۰۰ بزګرانو سره د اصلاح شویو غنمو او کیمیاوی سرو مرستو لړۍ پیل شو .
د ننګرهار د کرنې، اوبولګولو او مالدارۍ رببس مولوي عبدالستار محمد وویل؛ د ملګرو ملتونو د کرنې او خوړو اداري په مالي ملاتړ او د اکشن آیډ مؤسسې په تخنیکي همکارۍ دننګرهار په ۱۰ ولسوالیو «بهسود، سره رود، هسکه مېنه، ګوشته، دره نور، اچین، مومندره، لعلپوره، نازیان او پچیراګام» کې ۱۰ زره او ۲۰۰ بزګرانو سره د غنمو اصلاح شويو تخمونو او کیمیاوی سرو د مرستو په پار په ځینو ولسوالیو کې سروي روانه ده .
ددې مرستې په لړ کې، هر بزګرته دغنمو ۵۰ کیلو اصلاح شوي تخم، ۵۰ کیلو توره او ۵۰ کیلو یوریا سره ورکول کېږي.
د ننګرهار دکرنې رییس وویل، چې تېرکال د یادې اداري له لورې د ننګرهار په ۲۲ ولسوالیو کې ۲۷ زره او ۸۵۰ تنو بزګرانو سره دغنمو اصلا شويو تخمونو او کیمیاوي سرو مرسته شوې وه، ترڅو بزګران پر ځان بسیا او د خوړو خوندیتوب رامنځته شي.
ددې مرستې موخه د بېوزله بزګرانو ملاتړ، د خوړو خوندیتوب رامنځته کول او په ټوله کې د کرنیزو محصولاتو زیاتوالي ته زمینه برابرول دي.
