د پکتیا ولایت د غصب مخنیوي او غصب شویو ځمکو د تشخیص او تثبیت تخنیکي پلاوی هلې ځلې
۲۲ غبرګولی ۱۴۰۲ه.ش
۲۳ ذو القعدة ۱۴۴۴ ه.ق
د پکتیا د امارتي (سلطاني) عامه مرعي او وقفي غصب شویو ځمکو، د غصب مخنيوي او استرداد کمیسون تخنیکي پلاوی خپلې هلې ځلې کړندي کړي دي.
د پکتیا ولایت د غصب مخنیوي او غصب شویو ځمکو د تشخیص او تثبیت تخنیکي پلاوی په پکتیا ولایت کې د مشکوکو امارتي او عامه ځمکو د غصب مخنیوي په پار د دقیق سکېچ، کروکي، څلور خواوو او مساحت اخستلو لپاره ګرځنده تخنیکي ټیم بېلابېلو سیمو ته سفرونه ترسره کوي. په همدې موخه د خپلو فعالیتونو په جریان کې د روحاني بابا ولسوالی اړوند مموزیو سیمې ته په نوموړې سیمه کې د امارتي، عامه او شخصي ځمکو د تشخیص او د مموزيو قوم اړوند مبارک شاه نومي شخص لخوا د ملکیت اړوند اسنادو د تطبيق په موخه سفر ترسره کړ او د نوموړې سیمې دقیق سکېچ او کروکي واخیستل.
همدارنګه یاد ګرځنده تخنیکي ټیم د انور په نوم شخص لخوا متصرفه ځمکه چې اوس پرې مالکانه تصرف بند شوی دی، هم لیدنه وکړه.
د یادولو وړ ده چې په نوموړې سیمه کې به د امارتي، عامه او شخصي ځمکو د تشخیص او تثبیت اړوند دقیق املاکي تحقیقات ترسره شي او د ذیصلاح ارګانونو تر نهايي فیصلې پورې به په یاده سیمه کې هر ډول مالکانه تصرف بند وي.
باید وویل شي، چې د پکتیا ولایت د ځمکې د غصب مخنیوی او غصب شویو ځمکو د بېرته راګرځولو کمېټه تر دې دمه په دې ولایت کې د ډېرو ځمکو د غصب مخه نیولی او ترڅنګ یې ډېر غصب شوي ځمکې بېرته راګرځولي دي.
