پکتيا کې پر ۳۷۰ اړمنو کورنيو د مېږو د وېش لړۍ پيل شوه
۲۱ غبرګولی ۱۴۰۲ه.ش
۲۲ ذو القعدة ۱۴۴۴ ه.ق
د پکتیا دکرنې، اوبولګولو او مالدارۍ ریاست د همکارې برنامې اړیکو دفتر په همکارۍ ددې ولایت مرکز ګردیز، سيدکرم، ګرده څیړی، وزې ځدران، لجه منګل او جانۍ خېلو ولسواليو ۳۷۰ اړمنو کورنيو ته د مېږو د وېش لړۍ د پکتيا ولايت د کرنې،اوبولګولو او مالدارۍ رییس مولوي عبدالرؤف سعید، د اقتصاد رییس مولوي محمد انور راشد او د کلیو او پراختیا رییس مولوي محمد صادق، د اړیکودفتر ولایتی مسئول شریف الله ایوبي، د یادې مؤسسې کارکونکو او مالدارانو په شتون کې پيل شوه.
په دې اړه جوړه شوې غونډه کې د پکتیا دکرنې رییس مولوی عبدالرؤف سعید وويل، چې د يادې پروژې له پلي کېدو څخه يې موخه د سېلابونو د متضرره شويو کورنيو لاسنيوی، د مالدارانو د کورني اقتصاد پياوړتيا او په کور دننه مالدارانو ته د کاري فرصتونو برابرول دي.
په همدې حال کې د اړیکودفتر ولایتی مسئول شریف الله ایوبي وویل، چې په يادو کورنيو کې ۱۱۹ د مرکز، ۶۸ د سیدکرم ۳۶ د ګرده څېړی،۷۰ د وزي ځدراڼ، ۳۵ د لجه منګل او ۴۲ د جانی خیلو ولسوالۍ بې وزله کورنۍ شاملې دي، چې هرې مېږې سره یو بچی هم شامل و چې ټولیز شمېر یې ۷۴۰ ته رسېږي.
دغه راز د اقتصاد رییس مولوي محمد انور راشد په خپلو خبرو کې د خوښۍ ښودلو ترڅنګ له مالدارانو وغوښتل، چې د مېږو پالنې ته جدي پاملرنه وکړي او د اړیکو دفتر د دوامداره همکاریو څخه یی مننه وکړه.
ددې مرستې موخه د بې وزله کورنیو ملاتړ او په ټوله کې ددې ولایت د مالدارۍ سکټور پراختیا ته زمینه برابرول دي.
