د لغمان والي په مشرۍ د غصب د مخنيوي کمېسيون غونډه دائره شوه
د لغمان ولایت د امارتي ځمکو د غصب مخنیوی او غصب شویو ځمکو بېرته راګرځولو کمېټه د لغمان والي په مشرۍ غونډه دائره کړه.په دې غونډه کې د لغمان والي الحاج قاري زين العابدين عابد سربېره د لغمان ولایت د غصب د مخنيوي کمېسيون مشر او د کرنې او اوبو لګولو او مالدارۍ رییس مولوي محمد ولي محسن او د دې کمېسيون غړيو ګډون کړی وو.
ددې غونډې په ترڅ کې د لغمان د غصب مخنيوي کمېسيون مشر او د کرنې، اوبو لګولو او مالدارۍ رییس مولوي محمد ولي محسن د دې کېسيون د فعاليتونو او لاسته راوړنو په اړه هر اړخيزه معلومات د لغمان والي سره شريک کړل.
هغه وويل هڅوه کوي، چې په لغمان کې ټولې غصب شوې امارتي ځمکې تثبيت کړي او بيا يې د غاصبينو څخه راوګرځوي.
په ورته مهال د لغمان والي الحاج قاري زين العابدين عابد د غصب د مخنيوي کمېسيون له غړيو څخه مننه وکړه، چې په دې ولايت کې غصب شوې امارتي ځمکې تثبيت کوي.
هغه د ياد کمېسيون غړيو ته دنده وسپارله، چې ټولې غصب شوې امارتي ځمکې له غصب څخه راوګرځوي او هېچاته دې اجازه نه ورکوي، چې په دې ولايت کې امارتي ځمکې غصب کړي.
ښاغلي عابد د غصب د مخنيوي کمېسيون غړيو ته د ولايتي ادارې په استازولۍ د هر اړخيزه همکارۍ ډاډ ورکړ.
