د پکتیا ولایت د غصب مخنیوي او غصب شویو ځمکو د تشخیص او تثبیت پلاوي غونډه دائره شوه
۲۶ غویی ۱۴۰۲ه.ش
۲۶ شَوّال المُکَرَّم ۱۴۴۴ ه.ق
د پکتیا ولایت د غصب مخنیوي او غصب شویو ځمکو د تشخیص او تثبیت تخنیکی پلاوي اونیزه کاري غونډه تر سره کړه.
یاده غونډه چې د پکتیا ولایت د احکامو او فرامینو د تعقیب او نظارت ریاست کې جوړه شوې وه پکې د غصب د مخنیوي او غصب شوو ځمکو د تشخیص او تثبیت تخنیکي پلاوی رییس او غړو ګډون درلود.
د پکتیا ولایت د غصب مخنیوي او غصب شوو ځمکو د تشخیص او تثبیت تخنیکی پلاوي رییس مولوي عبدالرؤف سعید غونډې ته د پیل وینا واوروله او همدارنګه یې د تېرې اوونۍ د کاري پلان مطابق د ترسره شویو اجرااتو او تر لاسه شویو پایلو اړوند معلومات وړاندې کړل.
ورپسې د تخنیکي پلاوي غړو په نوبتي ډول د تېرې اوونۍ د ترسره شویو اجرااتو او په راتلونکې اوونۍ کې د تخنیکي پلاوي د چارو د لا بهبود اړوند خپل نظرونه شریک کړل.
په دې غونډه کې دغه راز د شېخانو او رباط سیمې د خلکو د تصرفاتو اړوند د مدعابها سیمې د کروکي ترتیب، د يادې سيمې د خلکو عرایضو ته د رسیدګي لپاره د منظم کاري پلان جوړول او په راتلونکې اونۍ کې د مکاوې او سلیمانزیو سیمې املاکي تحقیقات ترسره کولو په پآر هم خبرې وشوې.
د غونډې په ورو ستیو شیبو کې د تخنیکي پلاوي غړو د شېخانو او خواجه حسن قومونو استازو سره لیدنه وکړه او د تخنیکي پلاوی د رامنځ ته کېدو د اهدافو، مسؤلیتونو او په مشکوکو امارتي ملکیتونو کې د تصرف د منعې اړوند یې ورسره هراړخیز معلومات شریک کړل او د يادو قومونو د استازو ستونزې او مشکلات يې واورېدل. د تخنیکي پلاوی غړو ډاډ ورکړ چې د ځمکو د غصب مخنیوي او غصب شویو ځمکو د استرداد مقررې او د افغانستان اسلامي امارت د نافذه قوانینو په رڼا کې به د مشکوکو امارتي ملکیتونو اړوند املاکي تحقیقات ترسره کوي تر څو امارتي ځمکې له شخصي ځمکو سره تفکیک شي.
