لغمان کې پر ۱۵۰۰ بزګرانو د کرنیزو توکو د وېش لړۍ پیل شوی

۲۶ غویی ۱۴۰۲ه‍.ش
۲۶ شَوّال المُکَرَّم ۱۴۴۴ ه‍.ق
د لغمان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» په مالي او د «Action Aid» مؤسسې په تخنیکي همکارۍ ددې ولایت د مرکز مهترلام ترڅنګ د علیشنګ او دولتشاه ولسوالیو پر ۱۵۰۰ بزګرانو د شپږ ډوله کرنیزو وسایلو د وېش لړۍ پیل کړی دی.
په دې اړه جوړه شوې غونډه کې د لغمان دکرنې رییس الحاج مولوی محمد ولي محسن له یادو همکارو مؤسسو څخه د دغو مرستو د برابرولو په پآر د مننې ترڅنګ په راتلونکې کې د لازیاتو اغېزناکو پروژو د پلي کولو غوښتونکی شو او بزګرانو ته د هغوی د حقونو پر سپارلو ټینګار وکړ.
د چارواکو په خبره ددې پروګرام په لړ کې پر یادو بزګرانو «کشک، لور، کولنګ، اب پاش او دوه ډوله بیلچې» د کرنیزو فعالیتونو د ښه ترسره کولو لپاره  وېشل کېږي. 
د لغمان ولایت څه باندې ۸۵ سلنه وګړو ژوند په کرنه او مالدارۍ بوخت دي، د ځمکو  د کموالي او وړوکوالي له امله یې ژوند له اقتصادي پلوه له ستونزو او مشکلاتو سره مخ ده، په همدی اساس د لغمان دکرنې ریاست تل هڅه کوي، چې د بزګرانو او مالدارانو د ملاتړ په موخه ارزښت لرونکي پروژي خپله او هم د همکارو مؤسساتو له لارې پلي کړي.