ننګرهار کې د ځنګلونو خوندیتوب په پار هڅې
د ننګرهار دکرنې، اوبولګولو او مالدارۍ ریاست وایي، چې ددې ولایت د ځنګلونو د خوندیتوب او پراختیا په پار هلې ځلې کړندي کړي دي.
د چارواکو په خبره ددې ولایت د شېرزاد ولسوالی دکرنې ادارې د ځنګل ساتوونکو تېره ورځ د طوطو کلي اړوند د غمچۍ په غره کې درې تنه نیولي او د ولسوالی امینه قومندانۍ ته يي سپارلي، دي چې په یاد غره کې يي شنې ونې وهل.
د ننګرهار دکرنې ریاست چارواکي وایي، چې ځنګلونه یو ملی شتمني ده، او د دغه ملی شتمنۍ ساتنه د ټولو هیوادوالو وجیبه ده او دوی به هیچاته ددې شتمني د تخریب اجازه ورنکړي.
دوی همداراز په قومي مشرانو او ځايي خلکو غږ وکړ، چې د ځنګل پرې کولو څخه په کلکه ډډه وکړي، او که هر چا سرغړونه وکړه عدلي او قضايي ارګانونو ته به ور وپېژندل شي.
