د استخباراتو لوی ریاست ته د ۱۰۰ جریبه ځمکې د لېږد په اړه غونډه دائره شوه

د کرنې، اوبو لګولو او مالدارۍ وزارت د ځمکو چارو اداره وایي، چې د کابل ښار د پنځمې ناحیې اړوند د سيلو په افشار سيمه کې د استخباراتو لوی ریاست ته د ۱۰۰ جریبه ځمکې د لېږد په پار  د کرنې وزارت د ځمکو چارو ادارې، د استخباراتو لوی رياست او د سرې مياشتې ټولنې ترمنځ لومړنۍ غونډ دائره شوه.
په دې غونډه کې د کرنې، اوبو لګولو او مالدارۍ وزارت د ځمکو ادارې لوی ريیس ملا عبدالرحمن رحماني، د استملاکي پروژو د همغږۍ رييس الحاج شاه جهان جلات، د استخباراتو د لوی ریاست، کابل ښاروالۍ، د کور او ښار جوړونې وزارت او د افغاني سرې میاشتې ټولنې چارواکو ګډون کړی وو.
په دې غونډه کې د کرنې وزارت د ځمکو چارو ادارې، د استخباراتو لوی رياست او دافغاني سرې مياشتې ټولنې چارواکو له خوا د کابل ښار د پنځمې ناحیې اړوند د سيلو په افشار سيمه کې د ۱۰۰ جريبه ځمکې د اسنادو ارزونې غوښتنه وشوه. 
په دې غونډه کې پرېکړه وشوه، چې د روڼتيا رامنځ ته کولو په پار بايد د يادې ځمکې ټول اسناد په بې پرې ډول وارزول شي، تر څو ياده ځمکه په قانوني ډول يوې ادارې انتقال شي.
د کرنې، اوبولګولو او مالدارۍ وزارت د ځمکو ادارې لوی رييس  ملا عبدالرحمن رحماني د دې موضوع د روښانه کولو لپاره زیاته کړه، لومړی بايد معلومه شي چې یاده ځمکه د کوم اړوندې ادارې پورې تړلې ده او یا هم دغه ځمکه اماراتي ده، نو بايد یو پلاوی پکې د اړوندو ادارو د استازو څخه دا موضوع له نږدې وڅېړي.
د ځمکو ادارې مشرتابه زیاته کړه، دا چې په دې برخه کې دا لومړۍ غونډه ده، نو د سیمې او یادې ځمکې له هر اړخیزې ارزونې او همدارنګه د ځمکو ادارې کې د شته اسنادو له ارزونې وروسته به په راتلونکې غونډه کې په دې اړه تصمیم ونیول شي.
نوموړي دغه راز اړوندو څانګو ته لارښوونه وکړه، چې د موضوع جزييات او د کار پايلې له دوی سره تل شريکې کړي.