خوست کې د اوبو لګولو د دوو پروژو د رغولو چارې بشپړ او ګټې اخیستنې ته وسپارل شول

د خوست دکرنې، اوبولګولو او مالدارۍ ریاست وایي، چې د (TLO) همکارې مؤسسې په همکارۍ په دې ولایت کې د خامې او ماڼۍ کانالونو د رغولو چارې بشپړ او ګټې اخیستنې ته سپارل شوي دي.
په دې اړه جوړه شوې غونډه کې د خوست دکرنې رییس مولوی محمدزمان عمري او یوشمېر نورو سیمه ییزو چارواکو ګډون درلود.
په دې غونډه کې د خوست دکرنې رییس مولوی محمدزمان عمري وویل، چې خامې کانال ۱۳۷۵ متر اوږدوالی، ۱.۲۰ متره سور او یومتر لوړوالی لري، چې د نږدې ۱۰۰ زره امریکایي ډالرو په لګښت رغول شوی دی او ۱۳۲۰ جریبه ځمکه خړوبوي. دغه راز د ماڼۍ د اوبولګولو کانال کانال ۷۵۰ متر اوږدوالی، ۰.۷۰ متره سور او ۰.۸۰ متر  لوړوالی لري، چې د نږدې شپږ نیم میلیونه افغانیو په لګښت رغول شوی دی او ۱۸۸ هکټآره ځمکه خړوبوي.
د ښاغلي عمري په خبره د خامې کانال څخه ۶۳۰ کورنۍ په نېغه او سلګونه نورې کورنۍ په نانېغه ډول برخمن کېږي دغه راز د ماڼۍ د اوبولګولو کانال څخه ۱۲۰۰ کورنۍ په نېغه او سلګونه نورې کورنۍ په نانېغه ډول ګټه پورته کوي
ښاغلی عمري، یادې مؤسسې له فعالیتونو څخه د مننې ترڅنګ له دوی څخه د استنادي دېوالونو، سربندونو، اصلاح شویو تخمونو، کیمیاوي سرو او داسې نورو مثمرو او بنسټيزو پروژو د پلي کولو غوښتنه وکړه.
د یادو پروژو  په پلي کولو کې یوشمېر کسانو ته د کار زمینې برابرولو ترڅنګ سلګونه جریبه ځمکه د خړوبولو تر پوښښ لاندې راغلي دي.
دیادو پروژو د رغولو  موخه د اوبو مدیریت او د بزګرانو ګروندو ته پر وخت د اوبو رسول ښودل شوی دي.