هلمند کې ١٥٠ تنو کاریګرو ته د کار په بدل کې خوراکي غنم ووېشل شول
۱۵ کب ۱۴۰۱ه.ش
۱۳ شَعبان المُعَظّم ۱۴۴۴ ه.ق
د هلمند ولایت د کرنې، اوبولګولو او مالدارۍ ریاست لخوا د بولان څېړنیز فارم کې لسګونه روزمزد کاریګرو ته د کار په مقابل کې خوراکي غنم ووېشل شول.
په دې پروسه کې نږدې ١٥٠ تنو کاریګرو ته د کار زمینه برابره شوې وه چې د ٢٠ کاري ورځو په لړ کې هر نفر ته ٢٠٠ کیلو ګرامه خوراکي غنم ووېشل شول.
د یادو کاریګرو په مټ په فارم کې د غنمو ٢٤ جریبه تجربوي قطعاتو لومړۍ ځل خشاوه، د کیمیاوي سرو استعمال او اوبولګولو چارې ترسره شوي دي.
ددې تر څنګ په یاد فارم کې د ٢٦ جریبه انګوري او مېوه یي بڼونو په فني او مسلکي ډول جوړول، د ځمکې اړول او د ابیارۍ سیستمونو رغول، د فارم داخل کې د عمومي سړک رغول، د اړتیا وړ ځایونو کې د نیالګیو او ګلانو کرلو چارې هم سرته ورسېدې.
همدارنګه د فارم په محوطه کې د مېوه جاتو د ونو شاخبري او د انګورو بڼونو تاکبري تر څنګ د څېړنیز فارم ددفتر سیمه په درست ډول جوړه شوه او نږدې ۱۰ بابه شنې خونې پکې ورغول شول.
