هلمند کې د نباتي ناروغیو مخنیوی په موخه بزګرو ته د ترکیبي درمل جوړولو عملي او نظري زده کړې ورکول کېږي
۸ کب ۱۴۰۱ه.ش
۶ شَعبان المُعَظّم ۱۴۴۴ ه.ق
د هلمند دکرنې، اوبولګولو او مالدارۍ ریاست دکرنیزو چارو آمریت اړوند بوټیو ساتنې مدیریت فني کارکوونکو لخوا د نباتي ناروغیو او افاتو د له منځه وړلو په موخه په مېوه یې ونو د ترکیبي درملو (لایم سلفر) د استعمال په اړه بزګرو ته عملي او نظري روزنه ورکول کېږي.
د یادې پروسې له لارې ګڼو بزګرو او بڼوالو ته د لایم سلفر ترکیبي درملو جوړولو او کارولو لارې چارې په عملي او نظري ډول ښودل کېږي.
یاد ترکیبي درمل چې په اسانۍ سره یې بڼوال او بزګر هم چمتو کولای شي، چې ترکیب یې دوه کیلو ګرامه سلفر، یوه کیلو ژوندۍ چونه په ١٧.٥ لیتره اوبو کې منحل او پرته له سخت زړو ونو څخه د انارو او تاکانو د ونو په تنو او ښاخونو د استراحت په دوره کې شیندل کېږي.د یادو درملو په وسیله د قرغنې او سپېرغوږي د ناروغیو مخه نیول کېږي.
ددې پروسې په لړ کې د هلمند د کرنې ادارې فني کارکوونکي بزګرو ته په عملي او نظري ډول لارښونې کوي تر څو په اسانۍ سره د شته نباتي افاتو او ناروغیو مخنیوی وکړي.
د هلمند دکرنې ریاست هڅه کوي ترڅو بزګر وپوهوي چې د کیمیاوي درملو د احتمالي خطرونو د مخنیوی په موخه د نباتي افاتو او ناروغیو مخه په میخانیکي ډول ونیسي ترڅو په صحي او اقتصادي لحاظ غوره پایلې ولري.
