میدان وردګو ولایت کې یوشمېر بېوزله بزګرانو سره مرستې وشوې

د میدان وردګو ولایت دکرنې، اوبولګولو او مالدارۍ ریاست د امریکاپراختیایي ادارې (USAID) په مالي ملاتړ او د «نارټ سټار» مؤسسې په تخنیکي همکارۍ د میدان وردګو ولایت مرکز میدان ښار په ۸۷ بېوزله بزګرانو د کار په بدل کې خوراکي توکي وېشلي دي.
د چارواکو په خبره ددې مرستې په لړ کې هر کارګر ته د ۶۰ امریکایي ډالرو په ارزښت خوراکي توکي، چې په کې «اوړه، غوړي، وریجې، بوره، لوبیا او چای» شامل دي وېشل شوي دي.
باید وویل شي، چې موده مخکې هم د د امریکاپراختیایي ادارې (USAID) په مالي ملاتړ ددې ولایت له ۶۴۲ بزګرانو سره د غنمو د اصلاح شوي تخمونو او کیمیاوي سرو مرستې شوي دي او په پام کې ده، چې په نږدې راتلونکې کې ددې ولایت د نرخ په ولسوالی کې هم په ۳۰۰ بزګرانو لوبیا، دال او کیمیاوي سرې ووېشل شي.
ددې مرستې موخه د بېوزله بزګرانو ملاتړ او د دوی اقتصادي ودې ته زمینه برابرول دي.