د ننګرهار کانال ریاست کې د مالټې بڼونو جوړولو چارې پیل شوې
۲۲ سلواغه ۱۴۰۱ه.ش
۲۰ رَجَب المُرَجَّب ۱۴۴۴ ه.ق
د ننګرهار کانال ریاست چارواکي وايي، چې دد ریاست اړوندو ځمکو کې د سټروسو په ځانګړې توګه د مالټې بڼونو جوړولو په پار هڅې کړندي کړي دي.
د ننګرهار کانال رییس مولوي غلام الرحمن کظیم وویل، چې د ننګرهار کانال د هډې فارم عبدالخېلو بلاک په ۲۰۰جریبه ځمکې باندې د مالټې بڼونه جوړېږي، چې په کې به ۱۳۲۰۰ اعلی ډول مالټې کرل کېږي. ددې بڼ دکار د پیل په موخه جوړه شوې غونډه کې د کرنې، اوبولګولو او مالدارۍ وزارت مسلکي مرستیال مولوی صدراعظم عثماني، د ننګرهار دکانال رییس مولوی غلام الرحمن کظیم، د ننګرهار دکرنې رییس مولوی عبدالستار محمد او یوشمېر نورو چارواکو ګډون درلود او د یاد چارواکو له خوا د مالټو د نیالګیو په کېنولو سره ددې بڼ چارې پیل شوې.
د ننګرهار دکانال رییس مولوی غلام الرحمن کظیم وویل، چې دا ځمکه وروسته له څلورو لسیزو ابادېږي، ددغې ځمکې ارزښت به لا لوړ شي، سيمه به ورسره لا شنه او سرسبزه شي، ګڼ شمېر هېوادوالو ته به د کار زمينه برابره، د خلکو کورنې اقتصاد به ورسره ښه شي.
ښاغلی کظیم دغه راز وویل، چې ددې نوي مالټه باغ سره سم به د باغ څلور خواوو ته منظم تفريحي ځايونه، سړکونه، چمنونه او د ناستې ځایونه هم جوړېږي.
باید وویل شي، چې د ننګرهار کانال ریاست اړوند د عبدالخېلو بلاک دکرنې وړ کابو ۴۹۶ جریبه ځمکه په برکې نیسي، چې تېرکال هم ددې بلاک په څه باندې ۲۸۱ جریبه ځمکه کې د مالټې بڼونه جوړ شوي ول او ترڅنګ یې ددې سیمې په ۲۰ جریبه ځمکه کې د لیمو بڼونه هم جوړ شوي دي.
