پروان کې یوشمېر بزګران وروزل شول
۲۶ لېندۍ ۱۴۰۱ه.ش
۲۳ جمادي اﻷول ۱۴۴۴ ه.ق
د پروان دکرنې، اوبولګولو او مالدارۍ ریاست د سره صلیب ادارې په همکارۍ ددې ولایت په دوو ولسوالیو کې ۱۰۰ مخکښ بزګران د بزګرۍ اړوند په بېلابېلو برخو کې روزل کېږي.
د پروان دکرنې ریاست چارواکي وایي، چې ددې پروګرام په لړ کې د دې ولایت د سیدخېل او جبل السراج ولسوالیو ۱۰۰ مخکښو بزګرانو ته روزنیز پروګرامونه په پام کې نیول شوي دي، چې تر دې دمه د یادو ولسوالیو ۶۶ مخکښ بزګران روزل شوي دي.
دغو ۶۶ مخکښو بزګرانو ته د کرکېلي په بېلابېلو برخو کې روزنیز پروګرامونه په لاره اچول شوي ول، چې تر بشپړېدو وروسته یادو بزګرانو ته تصدیق لیکونه هم ورکړل شول.
په دې اړه جوړه شوې غونډه کې، دپروان ولایت دکرنې، اوبولګولو او مالدارۍ رییس نعماني د ورکشاپ کډونوالو ته په وینا کې دکرنې، دیني، اسلامي او قتصادي ګتې او ارزښت دشرعي نصوصو او نبوی احادیثو په ړنا کې تشریح کړل او بزگران یې د کرنې او مالدارۍ د تکثر او ترویج په پار وهڅول.
ددې پروګرام موخه ددې ولایت د بزګرانو وړتیاوې لوړول او په ټوله کې د کرنیزو محصولاتو زیاتوالي ته زمینه برابرول دي.
