پکتيا: پر ۲۹۴۱ مالدارانو د څاریو د خوراکي توکو ويش لړۍ پيل شو
۵ لېندۍ ۱۴۰۱ه.ش
۱ جمادي اﻷول ۱۴۴۴ ه.ق
د پکتيا ولايت د کرنې، اوبولګولو او مالدارۍ رياست له لورې د افغانستان لپاره د ناروې کمېټې په ملاتړ ددې ولايت د مرکز ګردیز په ګډون د احمدابا او زرمت ولسواليو پر ۲۹۴۱ اړمنو مالدارانو د څاریو د خوراکي توکو ويش لړۍ پيل شو.
په دې اړه جوړه شوې غونډه کې د پکتیا د کرنې، اوبولګولو او مالدارۍ رییس مولوي عبدالرؤف سعيد، د طبیعي سرچینو آمر مولوي زاهب الله ارسلا، د افغانستان لپاره د ناروې کمېټې چارواکو، مالدارانو او قومي مشرانو ګډون کړی وو.
په پیل کې د پکتیا د کرنې رییس مولوی عبدالرؤف سعید د افغانستان لپاره د ناروې کمېټې چارواکو څخه مننه وکړه، چې په دې سختو شرایطو کې ددې ولایت له مالدارانو سره مرستې او همکارۍ کوي.
ښاغلی سعید وویل، چې ددې مرستې په لړ کې ددې ولایت د مرکز ګردي په ۱۰۰۰، زرمت ولسوالی کې ۱۰۰۰ او احمدابا ولسوالی کې په ۹۴۲ مالدارانو د څارویو خوراکي توکي وېشل کېږي، چې په ټولیزه توګه ۲۹۴۱ مالداران کېږي او هر مالدار ته د څارویو ۲۰۰ کیلوګرامه خوراکي توکي ورکول کېږي.
د ياد پروګرام له تطبيق څخه موخه د اړمنو مالدارنو پر پښو درول دي، ترڅو اقتصادي وضعيت يې ښه شي.
