پکتیا: د اوبولګولو په برخه کې پروژې پلي کېږي
۱۷ لړم ۱۴۰۱ه.ش
۱۳ ربیعالثانی ۱۴۴۴ ه.ق
د پکتیا د کرنې، اوبولګولو او مالدارۍ رییس مولوي عبدالروف سعید په مشرۍ د نارویژن همکاری مؤسسې سره د همغږۍ غونډه ترسره شوه، چې پکې د کلیو او پراختیا ریاست استازی او د اوبولګونې ټولنو رئیسانو او قومي مشرانو ګډون کړي وو.
په یاده غونډه کې د نارویژن ولایتي مسئول په خپلو خبرو کې وویل، چې په پام کی لري راتلونکی کال کې ۵۵ د اوبولګولو وړې او لویې پروژې د مرکز ګردیز، احمدابا، سیدکرم او زرمت ولسوالیو کې پلي کړي، چې په یادو پروژو کې د کاریزونو او کانالونو پاکول، د بندونو رغول او پاکول شامل دي.
د پکتیا د کرنې، اوبو لګولو او مالدارۍ رییس مولو عبدالرؤف سعید په خپلو خبرو کې وویل، چې په یادو پروژو کې به ۸۵۰۰ کسان په کار بوخت شي او هر کس ته به روزانه ۵ امریکایي ډالر ورکول کېږي او له همکارو برنامو څخه یې وغوښتل، چې ژر تر ژره سروې ترسره کړي او د بزګرانو ستونزو ته د حل په موخه خپل فعالیتونه ګړندۍ او بې له ځنډه يې په خپل وخت سرته ورسوي.
