د ننګرهار کانال ریاست: د هډې فارم ځنغوزیو کاروبار کې سلګونو کسانو ته د کار زمینه برابره شوې ده
۸ لړم ۱۴۰۱ه.ش
۴ ربیعالثانی ۱۴۴۴ ه.ق
د ننګرهار د کانال ریاست چارواکي وایي، چې ددې ریاست اړوند د هډې فارم په دویم بلاک کې د ۱۴۰ میلیونه افغانیو په پانګونې د ځنغوزیو کاروبار روان دی، چې نږدې ۵۰۰ بېوزله هېوادلو ته چې ډېره برخه یې مېرمنې د کار زمینه برابره شوې ده.
له ښه بخته سږ کال به د ننګرهار د ځنغوزيو په حاصلاتو کې د پام وړ زیاتوالی راغلی ، د زیاتوالي یو لامل يې په غرنیزو سيمو کې د امنیت شتون دی.
د ننګرهار په اتو ولسواليو حصارک، شېرزاد، خوګیانو، پچیراګام، ده بالا، کوټ، اچین او سپین غر کې څه باندې ۱۱۶۰۹ هکټاره د ځنغوزيو طبیعي ځنګلونه شتون لري، چې د سیمې په ښکلا، د خلکو اقتصادي ژوند، هوا او د اقلیم په بدلون کي مثبت رول لري . .
ننګرهار د هغو ولایتونو له ډلې دی، چې زیاته اندازه د غوزانو، ځنغوزيو او نور مېوه لرونکې اوغیر مېوه لرونکې طبیعي ځنګلونه لري، چې له دې ډلې ۱۸ سلنه یې د ځنغوزيو په ونو پوښل شوي دي.
