کندهار کې په ۳۹ زره بزګرانو د غنمو اصلاح شوي تخمونه او کیمیاوي سرو وېش لړۍ پيل شو
۲ لړم ۱۴۰۱ه.ش
۲۸ ربیعالاول ۱۴۴۴ ه.ق
دکندهار دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې ((FAO په مالي او د (ADA) مؤسسې په تخنیکي همکارۍ ددې ولایت په مرکز او ۱۳ ولسوالیو کې په ۳۹ زره بزګرانو د غنمو د اصلاح شویو تخمونو او کیمیاوي سرو دوېش لړۍ پیل کړی دی.
په دې اړه جوړه شوې غونډه کې د کندهار کرنې، اوبولګولو او مالدارۍ رییس مولوی محمود مظلوم، د اقتصاد رییس مولوی عبدالسلام بریالی، دیادې مؤسسې د زون مشر ډاکټر فیروز آرین، اویوشمېر نورو چارواکو کډون درلود.
ددې مرستې په ترڅ کې هر بزګرته ۵۰ کیلو ګرامه د غنمو اصلاح شوي تخم، ۵۰ کیلوګرامه ډي.پي.اي او ۵۰ کیلوګرامه یوریا سره ورکول کېږي.
ددې مرستې موخه دبېوزله بزګرانو ملاتړ او په دې ولایت کې دکرنې پراختیا زمینه برابرول دي.
