ننګرهار کې له ۱۴۳۰ کورنیو سره د کرنې او مالدارۍ په برخه کې مرستې وشوې
۵ زمری ۱۴۰۱ ه.ش
۲۸ ذوالحجَّة ۱۴۴۳ ه.ق
د ننګرهار د کرنې، اوبولګولو او مالدارۍ ریاست سره په همغږۍ د (AHF) په مالي لګښت او د بشري مرستو دهمغږي مؤسسې (OCHR) په تخنیکي همکارۍ د دې ولایت په کامې او کوزکونړ ولسوالیو له ۱۴۳۰ بېوزله کورنیو سره د کرنې او مالدارۍ په برخه کې مرستې وشوې.
د ننګرهار دکرنې ریاست وایي، چې په هرې ولسوالۍ کې ۷۱۵ هغه کورنیو سره چې د وچکالۍ له امله زیانمن شوي دي د څارویو د خوراکي توکو، حیواني درملو، د سبو تخمونو او کرنیزو توکو مرستې وشوې.
په همدې موخه په جوړه شوي غونډه کې، د ننګرهار د کرنې اداری مرستیال قاري فضل الرحمن صادق، د بشري مرستو دهمغږي مؤسسې مسؤل، د مالدارۍ خدمتونو او څارویو روغتیا امر ډاکتر ضمیر بهسودي، د دواړو ولسوالیو ولسوال صاحبانو، قومې مشرانو او ګڼ شمېر ځوانانو برخه درلوده.
ددغو مرستو موخه د بېوزله کورنیو د ملاتړ ترڅنګ په دې ولایت کې د کرنې او مالدارۍ پراختیا او ودې ته زمینه برابرول دي.
