د کرنې وزیر د خوړو نړیوال پروګرام له استازي سره د غلو اسټراټیژيکو زېرمو پر جوړولو خبرې وکړې

۲۴ چنګاښ ۱۳۹۸
د کرنې، اوبولګولو او مالدارۍ وزیر نصیر احمد درانی او په افغانستان کې د خوړو د نړیوال پروګرام « WFP» استازی زلاتان میلیسیک د یوې غونډې په ترڅ کې د غلو دانو اسټراټیژيکو زېرمو د پروژو پر ښه پلي کېدو ټینګار وکړ.
دغه غونډه، چې نن د کرنې وزیر په دفتر کې تر سره شوه، په کې د دواړو نهادونو ترمنځ د اړیکو او همکاریو پر پیاوړتیا هم ټینګار وشوه.
په دې لیدنه کې دکرنې وزیر نصیر احمد درانی وویل، چې سږ په افغانستان کې د غنمو د تولید کچه د قناعت وړ دی او د خوړو له نړیوال پروګرام څخه غوښتنه وکړه، چې پر زیانمنو او اړمنو خلکو د غنمو د وېش په موخه په هېواد کې دننه تولید شوي غنم وپېري.
ښاغلی درانی دغه راز وویل، چې په افغانستان کې د نوی سیلوګانو د جوړولو په پآر تخنیکي تجربې لږې دي او دخوړو له نړیوال پروګرام څخه غوښتنه وکړه، چې د نویو سیلوګانو د جوړولو په برخه کې دې د کرنې له وزارت سره تخنیکي همکاري وکړي.
د خوړو نړیوال پروګرام استازی زلاتن میلیسیک وویل، چې یاد پروګرام د کرنې له وزارت سره هر ډول همکاریو ته چمتو ده. هغه وویل، چې د نوي سیلوګانو جوړولو او دغه راز د غلو دانو د اسټراټیژيکو زېرمو د جوړولو په پرخه کې د کرنې له وازرت سره همکاري کوي.