د پنبې د کروندو د پراختیا په پار څه باندې زر ننداریزې کروندې جوړېږي

۱۲ غویی ۱۴۰۰
د کرنې، اوبولګولو او مالدارۍ وزارت د ۱۴۰۰م کال د پلان له مخې په یو شمېر ولایتونو کې د پنبې د کروندو د پراختیا او د پنبې د عصري کرکېلي دودولو په پار د پنبې یو زرو ۴۰ یو جریبه ننداریزې کروندې جوړېږي.
د کرنې وزارت د راون کال د پلان پر بنسټ په هرات، سرپل، کندز، بلخ، ننګرهار، لغمان، کندهار، نیمروز، فاریاب، تخار، سمنګان، بغلان او هلمند ولایتونو کې د پنبې  یو زرو ۴۰ ننداریزې جوړېږي. دغه ننداریزې کروندې هر یوه یې په یوه جریبه ځمکه کې کرل کېږي.
د یادو ننداریزو کروندو د جوړېدو موخه د پنبې کرکېلې ته د کروندګرو هڅول، د تولیداتو ډېروالی، داخلي او نړیوالو مارکېټونو او بازارونو ته د کیفیت تضمین او لا ښه والی دی.