په ۱۳۹۹یم مالي کال کې د اوبولګولو د برخې کړنې

دهقان (بزګر) اوونیزه
د کرنې وزارت له اوږدمهالو موخه څخه یو هم داده، چې وکولی شي د اوبولګولو د سیسټمونو د پیاوړتیا، بیارغونې او جوړونې له لارې د کال ۵۰ زره هکټاره کرنیزې ځمکې د خړوبولو تر پوښښ لاندې راولي. د ۹۹یم مالي کال په ترڅ کې د کرنې وزارت د یوزر او ۳۷۸ کیلو مترو کانالونو او اوبولګولو شبکو په بیارغونې او رغونې سره توانېدلی دی، چې ۹۷زره او ۳۶۰ هکټاره کرنیزې ځمکې د خړوبولو ترپوښښ لاندې راولي. دغه راز په دې کال کې ۳۱ زره او ۵۰۶ متره محافظتي دېوالونه یې جوړې کړي دي او دهېواد په بېلابېلو سیمو کې د څلور زره او ۲۵۹ هکټاره ځمکو د تخریب د مخنیوي په پار یې ګبیوني چارې ترسره کړي دي.
دغه راز د غور، میدان‌وردګ، پکتیا، دایکندي، بغلان، کونړ، بادغیس، پنجشیر، زابل، تخار، ننگرهار، هلمند، کابل، غزني، پکتیکا، خوست، فراه، ارزگان، کندهار، هرات، بلخ، لوگر، پروان او کابل په ولایتونو کې د اوبولګولو د ۱۲۱ شبکو د جوړنې او بیارغونې چارې نږدې ۸۹ سلنه بشپړې شوي دي. په ورته وخت کې د کندز، تخار، بدخشان، ننګرها او جوزجان په ولایتونو کې د ۴۳۵ فرعي کانالونو درغونې او بیارغونې چارې ښه پرمخ تللي دي. د اوبولګولو د ۹۹ کانالونو ۳۵ سلنه چارې له تېر لمریز کال څخه پاتې وه او د ۳۳۶ نورو کانالونو د رغونې او بیارغونې چارې په ۱۳۹۹یم مالي کال کې پیل شوې. په ټولیزه توګه په ۱۳۹۹یم کال کې ددغو کانالونو د رغونې او بیارغونې چارې ۸۵ سلنه پرمخ تللي دي. په ورته وخت کې په تېرمالي کال کې د هېواد په ۱۷ ولایتونو کې د اوبولګولو ۴۷ شبکې جوړ او دغه راز د ۱۲۵ نویو کانالونو چارې بشپړې شوې.
دغه راز په درو ولایتونو کې ۱۸ ابرېزې جوړې شوي دي او د غور، سمنګان او کندهار په ولایتونو کې د اوبوګرځولو د ۸۰ خاورینو بندونو د جوړلو چارې بشپړې شوي دي. د سمنګان، کندهار او غور ولایتونو د ابرېزو په سیمو کې د ۱۴زره او ۹۷۴ مترمکعب چکډمونو (محافظتي بندونو) او د اوبو وړو زېرمو د جوړولو چارې بشپړې شوې او د اوبولګولو د ۲۱ شبکو د جوړولو چارې پیل شوې. د یادو شبکو رغنیزې چارې ۷۰ سلنه بشپړې شوي دي.
په همدې توګه د ۹۹ یم مالي کال په ترڅ کې د اوبولګولو د ۱۵۶ کانالونو د رغونې او بیارغونې چارې نږدې ۴۸ سلنه پرمخ تللي، چې دمګړۍ یې هم رغنیزې چارې روانې دي. د ننګرهار او جوزجان په ولایتونو کې هم د یوزر او ۵۹۰ متره محافظتي دېوالونو رغنیزې چارې روانې دي.
دغه راز په ۹۹یم مالي کال کې د دایکندي، پکتیا، بلخ، سمنگان، بغلان، نورستان، ننگرهار، کونړ، لغمان، هرات، غور، خوست، پکتیکا، ارزگان، کندهار او بادغیس په ولایتونو کې د اوبولګولو د ۱۲۱ کوچنیو ابرېزو د جوړولو چارې هم ښه پرمخ تللي دي. د ۱۱ آبرېزو نږدې ۳۷ سلنه چارې له تېرکال څخه پاتې و او د ۱۱۰ ابرېزو چارې سږکال پیل شوې. په ټولیزه توګه ددغو ابرېزو چارې ۹۵ سلنه بشپړې شوي دي.
د ۱۳۹۹یم مالي کال په ترڅ کې د لوګر، خوست، پکتیا او جوزجان په ولایتونو کې د بڼوالۍ او کرنیزو فعالیتونو په پار د اوبو د ۱۷ زېرمو چارې پیل شوې، چې رغنیزې چارې یې نږدې ۹۰ سلنه بشپړې شوي دي.
د باران اوبو زېرمه کولو په پار د اوبو ۱۲۰ زېرمې جوړول
د کابل پکتیا، بلخ، سرپل، سمنگان، تخار، ننگرهار، کونړ، لغمان، هرات، غور، خوست، پکتیکا، ارزگان، کندهار، بادغیس او زابل په ولایتونو کې د باران د اوبو زېرمه کولو په پار د ۱۲۰ خاورینو زېرمو جوړول او دغه راز د کابل، دایکندي، پکتیا، بلخ، سرپل، سمنگان، بدخشان، تخار، فاریاب، ننگرهار، کونړ، لغمان، غور، خوست، پکتیکا، ارزگان، بادغیس او زابل په ولایتونو کې ۲۰۰ کوچني چکډمونه جوړول هم د کرنې وزارت د ۱۳۹۹یم مالي کال په برنامه کې شامل و، خو په یادو برخو کې لاسته راوړنه نه لري.
د کرنې، اوبولګولو اومالدارۍ وزارت د ۱۳۹۹یم مالي کال په ترڅ کې د اوبولګولو په برخه کې د خپلو فعالیتونو او کړنو په پلي کولو سره توانېدلی دی، چې په اوبیزو کرنیزو سیمو کې ۲.۵ سلنه زیاتوالی راولي. د اوبولګولو د کانالونو او شبکو د رغونې، بیارغونې او د اوبولګولو د سیسټمونو د پیاوړتیا په برخه کې د پرمختګونو ترڅنګ، په هېواد کې د اوبو د بندونو او د اوبولګولو د سترو زېرمو د کموالي له وجې هېواد په دې برخه کې مناسبه پرمختیا ته نه دی رسېدلی.