د چرگانو روزنې د سکټور وده او ځان بسیاینه د کرنې وزارت لومړیتوب ده

۳ کب ۱۳۹۹
د کرنې، اوبولګولو او مالدارۍ وزیر ډاکټر انوارالحق احدي په دفتر کې، د مالدارۍ او کرنیزو تولیداتو خونې استازی، د چرګانو تولیدوونکو او پروسس کوونکو سرتاسري ټولنې، خصوصي سکټور او د افغانستان د خونو فدارسیون د استازو په شتون کې غونډه په لاره واچول شوه.
په دې غونډه کې د چرګانو روزنې سکټور د فرصتونو او ننګونو د ارزونې او د یاد سکټور پر تلپاتې پراختیا، او راتلونکو برنامو خبرې وشوې.
د کرنې وزیر وویل، چې د چرګانو روزنې د محصولاتو صنعت د مدیریت غوره طرحه تر کار لاندې ده، او ددې طرحې د لا پیاوړتیا په پار د خصوصي سکټور، د مالدارۍ او کرنیزو تولیداتو د خونې، ټولنې او د ښکېلو خواوو سلا مشورې مرسته کوي.
ښاغلی احدي وویل: «داچې د خصوصي سکټور، د مالدارۍ او کرنیزو تولیداتو خونې او نورو اړوندو برخو په همکارۍ، د هګۍ، د چرګانو غوښې او دانې په برخه کې ځان بسیاینې ته ورسېږو او په دې برخه کې لا ډېرې پانګونې وکړو دقیقې شمېرې او مالوماتو ته اړتیا لرو؛ باید ووایو چې د چرګانو روزنې سکټور پیاوړتیا او په دې برخه کې ځان بسیاینې ته رسېدل زموږ له لومړیتوبونو او اساسي برنامو څخه دي او د خصوصي سکټور ونډه هم په کې د پام وړ دی.»
دغه راز د کرنې وزارت د اوبولګولو او طبیعي سرچینو مرستیال حشمت الله غفوري په دې غونډه کې وویل، چې د کرنې وزارت د مشرتابه لیدلوری د چرګانو د ټولو محصولاتو د تولید په برخه کې ځان بسیاینې ته رسېدل دی او د کرنې وزارت په دې برخه کې د خصوصي سکټور همکار دی.
وروسته د مالدارۍ او کرنیزو تولیداتو د خونې رییس خان محمد فروتن وویل، چې په هېواد کې د چرګانو روزنې سکټور فوق‌العاده پرمختګ ګړې، خو لاهم یوشمېر ننګونې شتون لري. هغه هېواد ته د «برېډر چرګانو د قاچاق» د مخنیوي غوښتنه وکړه او ویې ویل، چې د کرنې وزارت تل د چرګانو روزنې سکټور سره مرستې کړي دي او د اوسني وړتیاوو د شتون لامل هم، له دې برخې سره د کرنې وزارت ملاتړ دی.
د چرګانو د تولیدوونکو او پروسسوونکو ټولنې رییس انصارالله بختانی وویل، چې «اوس هم په پراخه کچه د ژوندیو چرګانو قاچاق روان دی، او باید د کرنې وزارت او د مالدارۍ او کرنیزو تولیداتو خونې سره په همغږۍ دولتي ادارې د چرګانو د قاچاق مخه ونیسي. هغه زیاته کړه، خصوصي سکټور چمتو دی، چې د چرګانو روزنې په برخه کې لاډېرې پانګونې وکړي او له حکومته د ځمکې غوښتنه کوي. هغه دغه راز د کرنې له وزارت څخه وغوښتل، چې د چرګانو د محصولاتو واردات د شرایطو پر اساس وي، ترڅو یاد سکټور زیانمن نشي.
په همدې توګه د افغانستان د خونو فدراسیون استازی، د کرنې وزارت څخه د «سټاک مورني» چرګانو او د چرګانو د دانې د تولید په برخه کې د پانګونې د ملاتړ غوښتنه وکړه.
باید وویل شي، چې په دې غونډه کې د چرګانو روزنې په سکټور کې د فارمونو د ملي سروې د پیل پر تابیاوو هم خبرې وشوې