د چرګانو روزنې د صنعت د ودې په پار هڅې: هېواد کې سږکال یوزر او ۹۰۰ غیر فعال فارمونه بیا فعال شوې دي

۱۲ سلواغه ۱۳۹۹
د ډېرو افغانانو شغل کرنه او مالدارۍ ده. د چرګانو ساتلو فارمونه په ځانګړې توګه د ښځو له پاره د عاید ترلاسه کولو مناسبه لاره ده. خو افغان کورنۍ د فارمونو د پراخولو له پاره پوره اقتصادي وړتیا او مهارت نه لري. د افغانستان حکومت د نړیوالو سازمانونو په مرسته له دغو کورنیو سره مرسته کوي، ترڅو له یوې خوا هېواد د چرګانو غوښې او هګیو په برخه کې پرځان بسیاشي او له بلې خوا د بېوزلو کورنیو اقتصادي پیاوړتیا او خلکو ته د کاروبا زمینه برابره شي.
هېواد کې د چرګانو روزنه په دې وروستیو کلونو کې ډېره وده کړې او پر فارمونو یې میلیونونه ډالره پانګونه شوې ده.
سږکال هم د هېواد په بېلابېلو ولایتونو کې د یوشمېر وړو فارمونو ترڅنګ د چرګانو روزنې لوی فارمونه هم جوړ شوي دي او ترڅنګ یې د کرنې وزارت د مالدارۍ د لوی ریاست په خبره د هېواد په کچه د چرګانو روزنې یوزر او ۹۰۰ غیرفعال فارمونه هم بیا فعال شوي دي.
په یاد یوزر او ۹۰۰ بیا فعال شوي فارمونو کې لوی او واړه فارمونه شامل دي، چې واړه فارمونه یې د کرنې وزارت د مالدارۍ لوی ریاست په تخنیکي مشورې او مرستې د خصوصي سکټور له لارې او لوی فارمونه یې د کرنې وزارت په هغږۍ د امریکا متحده ایالاتو نړیوالې پراتیایي ادارې د ځنځیري ارزښت پروژې (USAID -Value chain ) له خوا د ۷۰ سلنه لګښت په ورکولو سره بیا فعال شوي دي.
په افغانستان کې د چرګانو روزنې فارمونه جوړول لویه لاسته رواړنه ده، چې د کارموندنې، اقتصادي پیاوړتیا، ځان بساینې او د اقتصادی ودې او پرمختیا لامل کېږي
باید وویل شی، چې د کرنې وزارت د چرګانو روزنې د فارمونو او د چرګانو د غوښو او هګیو د تولیداتو د ډېرولو ترڅنګ د فارمې چرګانو روغتیایې برخې ته هم پاملرنه کړې ده، چې د افغانستان په ځېنو برخو کې د چرګانو ناروغیو تشخصیه کلینیکونه یې هم جوړې کړي دي.