کندهار او هرات کې د اوربشو سږني حاصلات زیات شوي

۳ مرغومې ۱۳۹۹
د کندهار او هرات ولایتونو د کرنې، اوبولګولو او مالدارۍ ریاستونو چارواکي وایي، چې سږ کال یې د اوربشو په حاصلاتو کې د پام وړ زیاتوالی راغلی دی.
د یادو ولایتونو د کرنې ادارې د چارواکو په خبره، په یادو ولایتونو کې سږکال د اوربشو کروندې او حاصلات د پام وړ زیات شوي دي.
اوربشې د هېواد په نږدې ټولو ولایتونو کې کرل کیږي، چې کندهار او هرات یې تر ټولو لوی تولیدونکي ولایتونه ګڼل کیږي.
د کرنې، اوبولګولو او مالدارۍ وزارت د احصایې ریاست د ۱۳۹۸ یم کال د مالوماتو له مخې د افغانستان په ۸۴ زره ۷۰ هکتاره ځمکه اوربشې کرل شوي وې، چې د تولید حاصلاتو کچه یې ۱۲۳ زره او ۵۷۶ ټنو ته رسېده، چې سږ کال دا شمیرې د بدلېدو په حال کې دي.
د کندهار او هرات د اوربشو د حاصلاتو د زیاتوالي عمده لاملونه د اوربشو د کروندو زیاتوالی، پر وخت او ډېر اورښتونه او د اوربشو د بیو لوړېدل دي.
اوربشې د افغانستان په ګڼو ولایتونو کې ښه حاصل ورکوي، چې لوی تولیدونکي ولایتونه یې هرات، کندهار، سرپل، بدخشان او فاریاب دي، چې هر کال له یادو ولایتونو په زرګونه ټنه اوربشې راټولیږي.