د لوېدیځ زون پر بزګرانو د پستې څه باندې ۲۷ زره نیالګي ووېشل شو

۱۱ غبرګولی ۱۳۹۸
د کرنې، اوبولګولو او مالدارۍ وزارت د بڼوالۍ او مالدارۍ ملي برنامه «NHLP» د هرات او بادغیس ولایتونو پر پسته کارو بڼوالو د پستې ۲۷ زره او ۵۰۰ نیالګي ووېشل.
دغه نیالګي پر هغو بڼوالو وېشل شوي، چې تر دې مخکې د یادې پروژې د کارکوونکو له خوا سروې شوي ول.
ددغو نیالګیو له ډلې په بادغیس ولایت کې ۱۱ زره او په هرات ولایت کې ۱۶ زره او ۵۰۰ نیاګلي وېشل شوي دي. دا په داسې حال کې ده، چې ټاکل شوي سږ د پستې د هغو بڼونو ۶۱ زره او ۲۵۰ نیالګي، چې د بڼوالۍ او مالدارۍ ملي برنامې له خوا جوړ شوي دي پیوند شي او بڼوالو ته د تخنیکي سلا مشورو ورکولو ترڅنګ پر دوی سیمي جالۍ او همداراز د اوبو ټانکر او د اوبولګولو په پار پایپونه هم ووېشل شي.
د کرنې وزارت د بڼوالۍ اومالدارۍ ملي برنامه د هېواد په لوېدیځ زون کې له ۲۰۱۴ ام کال را په دې خوا څه باندې پنځه زره جریبه د پستې بڼونه جوړ کړي دي.