کونړ کې د کب روزنې ۲۰ سوداګریز فارمونه ګټې اخیستنې ته وسپارل شول

۱۴ لړم ۱۳۹۹
کونړ کې د کب روزنې چارې او فارمونه د ودې په حال کې دي او په تېرو څو کلونو کې په دغه ولایت کې د کبانو روزنې ډېر شمېر فارمونه جوړ شوي دي.
د کرنې، اوبولګولو او مالدارۍ وزارت په دې ولایت کې د کب روزنې د ترویج او دودولو په پار د کب روزنې د ګڼ شمېر فارمونو د جوړولو ترڅنګ ددې ولایت له کب روزونکو سره هر اړخیزې تخنیکي او مالي مرستې او همکارۍ کړي دي. ددغو مرستو او همکارویو په دوام داځل دکونړ ولایت په نرنګ، سرکاڼو او  څوکۍ ولسوالیو کې د ګرمو اوبو ماهیانو د بچیو د تولید هچري او ۲۰ بابه د ماهیو یوجریبه سوداګریز فارمونه جوړ او ګټې اخیستنې ته وسپارل شول.
د کونړ د کرنې ریاست وایي، چې د کرنې وزرات له خوا ددې ولایت د کبانو روزنې د فارم لرونکو د ملاتړ او په دې ولایت کې د کب روزنې د ترویج په پار د ګرمو اوبو ماهیانو د بچیو د تولید هچري، چې د کبانو  د ۲.۲ میلیونه بچیو د تولید وړتیا لري او د کب روزنې ۲۰ بابه یو جریبه سوداګریز فارمونه چې هر یوه یې د دوه زره کبانو د روزنې وړتیالري جوړ او رسماً پرانیستل شول.
د کونړ د کرنې، ابولګولو او مالدارۍ ریاست چارواکي وایي، چې ددې ولایت د کبانو روزنې د فارمونو د پراختیا په پار یوشمېر پروژې په پام کې نویل شوي دي، چې په دغو پروژو کې پر فارم لرونکو د کبانو بچي وېشل او د کبانو روزنې نوي فارمونه جوړول شامل دي.
د کونړ د کرنې ریاست د چارواکو په خبره، خلکو ته د کاري فرصتونو برابرولو او د کورنیو اقتصادي پیاوړتیا په پار په پام کې ده، چې په دې ولایت کې د کبانو ډېر شمېر فارمونه جوړ شي.
په افغانستان کې د کب روزنې د فارمونو شمېر څه باندې دوه زرو ته رسیږي، چې ډېری یې په کندهار، هلمند، ارزګان، ننګرهار، لغمان، بلخ او نیمروز ولایتونوکې شتون لري او له دغو فارمونو څخه په کال کې څه باندې ۱۰ زره ټنه کبان تولیديږي.