د بوديجې دلګولو په غونډه کې مطرح شوه؛ د کرنې وزارت د پراختيايي بوديجې دلګولو کچه ۶۲ سلنې ته رسېدلې ده
۵ لړم ۱۳۹۹
د کرنې وزارت د سرپرست او نوماند وزير ډاکټر انوار الحق احدي په مشری او د اړوندو چارواکو په شتون کې، دکرنې وزارت د پراختيايي بوديجې د مصرف په هکله غونډه وشوه.
په دې غونډه کې، د کرنې وزارت د پراختيايي بوديجې په لګولو تر خبرې وروسته د ۱۴۰۰ مالي کال د پراختيايي بوديجې په هکله هم وړانديزونه وړاندې شوه.
په پيل کې د کرنې وزارت مالي او اداري مرستيال عبدالهادي رفيعي، د پراختيايي بوديجې پر لګولو، د پروژو پر وضعيت او دکال دپلانونو په هکله معلومات وړاندې کړه.
ښاغلی رفيعي وويل، چې اوسمهال د کرنې وزارت د پراختيايي بوديجې د مصرف کچه ۶۲ سلنې ته رسېدلې ده او دکال ترپايه هلې ځلې کيږي، چي وزارت خپل ټاکلي موخې ته ورسيږي.
په همدې حال کې د کرنې وزارت سرپرست د بوديجې معقول او اغېزناک لګولو ته په اشارې سره ټينکار وکړ چې، د کال تر پايه بايد وزارت خپلې موخې ته ورسيږي. دغه راز ښاغلی احدي په دې غونډه کې د راتلونکي کال د بوديجې دښه والي په موخه خپل لارښوونيز نظريات هم وړاندې کړه.
